Опера уонна балет тыйаатыра саҥа сезонун арыйда
![](https://sakha-sire.ru/wp-content/uploads/2023/09/knyaz-igor-900x596.jpeg)
Балаҕан ыйын 14 күнүгэр Д.К. Сивцев-Суорун Омоллоон аатынан Опера уонна балет тыйаатыра саҥа 53-с сезонун «Князь Игорь» диэн аатырбыт операнан арыйда.
![](https://sakha-sire.ru/wp-content/uploads/2023/09/img_7990.jpg)
«Князь Игорь» — бу «Слово о полку Игореве» нуучча бастакы литературнай мэҥэ суруйуутун матыыбынан туруоруллубут опера буолар. Манна половецтар уонна нуучча кинээстэрин киирсиилэрэ көстөр. Бу операҕа ойуун көстүүтэ, кыыл-сүөл саҥата, хомус тыаһа, чорооннор көстөллөрө атын ханна да суох, ураты тыынныыр.
А.Бородин оператын Андрей Борисов ураты туруоруута уонна нуучча муусукатын историга Евгений Левашев оҥоруута атыннык арыйан көрдөрөр. Кинээс Игорь баартыйатын норуодунай артыыс Александр Емельянов толордо.
Испэктээкил тыйаатыр бары солистарын, хуорун, оркестрын, тиэхэньиичэскэй үлэһиттэрин, балет артыыстарын — сүүһүнэн киһи үлэтин түмүгэ буолар.
![](https://sakha-sire.ru/wp-content/uploads/2023/09/photo1694176581.jpeg)
![](https://sakha-sire.ru/wp-content/uploads/2023/09/39909t6bp.jpg)
![](https://sakha-sire.ru/wp-content/uploads/2023/09/photo1694176581-1.jpeg)
![](https://sakha-sire.ru/wp-content/uploads/2023/09/8111e7a3d958880574a276fbe0ccc9a2-jpeg.jpeg)
Быйылгы сезоҥҥа 4 премьера, бэстибээллэр буолуохтара. Бу сыл бүтүөр диэри «Подвиг» балеты туруоруохтара. Бу испэктээкилгэ саха норуота Аҕа дойду сэриитигэр киллэрбит кылаатын, хорсун быһыытын көрдөрүөхтэрэ, аныгы ааптар муусукаларын туһаныахтара. Ону тэҥэ, экология, аныгы уопсастыба олоҕун сытыы боппуруостарын таарыйар «Траектория шамана» опернай испэктээкили туруоруохтара.
Пандемия саҕаланыаҕыттан аан бастаан икки бэстибээл ыытыллыаҕа. Сэтинньи 2-12 күннэригэр «Ария Севера» опернай бэстибээл атын эрэгийиэннэртэн дирижердары, солистары түмүөҕэ. Оттон Бүтүн Арассыыйатааҕы «Стерх» балетнай бэстибээл 2024 сыл сааһыгар ыытыллыаҕа.
Сообщить об опечатке
Текст, который будет отправлен нашим редакторам: