Орто Халыма Хатыҥнааҕар субуотунньуктаан баран, күрэхтэстилэр

Орто Халыма улууһун Хатыҥнаах нэһилиэгин олохтоохторо, төһө да хаар уулла илик буоллар, бүгүҥҥү бырааһынньыктарын «Дорообо, Күөх Маай!» диэн ааттаан тэрийэн ыыттылар. 

Нэһилиэк баһылыга Иван Белоногов бырааһынньыктааҕы тэрээһин туһунан бу курдук кэпсээтэ:

— Тэрээһиммит «Муус тиэйиитэ» түһүмэхтэн саҕаланна. Манна субуотунньугунан  15 ыалга муус тиэйдибит.

Онтон бураанынан, шашлык буһарыыга хамаанданан күрэхтэһии буолла.

Бырааһынньыктыы киэргэммит 20 бураан кыттан, бочуоттаах төгүрүмтэни оҥорон, дьону сэргэхситтэ.

Шашлык күрэҕэр 8 хамаанда кыттыыны ылла. Бу түһүмэххэ балыыһа кэлэктиибэ тэҥнээҕин булбакка, бастаан таҕыста.

«Ростелеком» филиалын хамаандата эмиэ бэрт көхтөөхтүк кыттан бэлиэтэннэ.

Ити курдук, чаҕылхай күннээх сааскы Пиэрибэй Маай күнүн Хатыҥнаах нэһилиэгин олохтоохторо субуотунньуктаан, ыраас салгынынан дуоһуйа тыынан олус көхтөөхтүк атаардылар.