Орто Халымаҕа баһылык сымыйа докумуонунан бириэмийэ ылбыт

Орто Халыма улууһугар муниципальнай сулууспалаах дьахтар боломуочуйатын туһанан албыннааһыҥҥа буруйданан сууттанна. Кини дьаһалта баһылыгар бириэмийэ аныыр туһунан сымыйа докумуону оҥорбут.

Докумуон былырыын кулун тутар ыйыгар буруйдаах тус көмпүүтэригэр оҥоһуллубут уонна нэһилиэк дьокутааттарын Сэбиэтин бэрэссэдээтэлин аатыттан баттаммыт.

Силиэстийэҕэ быһаарыллыбытынан, дьахтар дьаһалта баһылыгын интэриэһинэн салайтаран, баһылыкка сокуоннайа суох бириэмийэ аныыр докумуону оҥорбут. Суут дьахтар дьайыыларын официальнай докумуоҥҥа соруйан сымыйа сибидиэнньэлэри киллэрии быһыытынан сыаналаата.

Буруйун билиммитин, быраабы харыстыыр уорганнары кытта бииргэ үлэлээбитин уонна судаарыстыбаннай буруйдааччы этиитин учуоттаан, Үөһээ Халыма оройуонун суута буруйдааҕы холуобунай эппиэтинэстэн босхолоото уонна 30 тыһ. солк. кээмэйдээх ыстараабы анаата.

Ыстараап төлөммүт, уураах сокуоннай күүһүгэр киирбит. Холуобунай дьыала борокуруор бэрэбиэркэтин матырыйаалларынан көбүтүллүбүт, диэн СӨ Борокуратууратын пресс-сулууспата иһитиннэрэр.