Саха сиригэр халаан уутун этэҥҥэ аһарарга бэлэмнэнии үлэлэр бараллар. Ол курдук, Орто Халыма куоракка ыксаллаах быһыы-майгы тахсыбатын туһугар быһыты эбии бөҕөргөтүөхтэрэ.
Саха сирин Бырабыыталыстыбатын Бэрэссэдээтэлин бастакы собуйааччы Дмитрий Садовников өрөспүүбүлүкэ Арктикаҕа сытар оройуоннарыгар 2024 сыллааҕы халаан уутуттан уонна баһаар туруутуттан бэлэмнэниигэ ыыппыт мунньаҕар туһааннаах сорудаҕы биэрдэ.
“Сабаҕалааһыннар этэллэринэн, сааскы халаан уута эрэгийиэҥҥэ кутталы үөскэтиэн сөп. Быйылгы сылга дойдуга уонна аан дойдуга даҕаны халаан уута нэһилиэнньэлээх пууннарга улахан хоромньуну таһаарда. Саха сирэ халааны көрсөргө бэлэмнээх буолуохтаах, онон сэрэтэр үлэни тэрийиэхтээхпит, тахсыан сөптөөх сирдэригэр болҕойон сыһыаннаһыахтаахпыт. Биһиги сирбит-уоппут улахан, өрүстэрбит элбэхтэр, онон халаан куттала баар”, — диэтэ Дмитрий Садовников мунньахха.
Кини Саха сирин Ил Дархана Айсен Николаев өрөспүүбүлүкэҕэ халаан этэҥҥэ ааһыытыгар бэлэмнэнии боппуруоһун ураты хонтуруолга тутарын бэлиэтээтэ.
Мунньах түмүгүнэн Халыма оройуоннарыгар муус харыыта тахсыбатын туһугар эстэрэр эттиктэри кэмигэр тиэрдиини хааччыйарга сорудахтанна. Хоту оройуоннарга ыксаллаах балаһыанньа үөскүүр түгэнигэр авиация түргэнник дьаһанарга бэлэм олоруохтаах, суол-иис алдьанар түгэнигэр чөлүгэр түһэрэр тиэхиньикэ бэлэм буолуохтаах.
Мунньахха Росводресурс Өлүөнэтээҕи бассейнын ууга управлениетын салайааччыта Петр Аргунов Халыма өрүскэ сэрэтэр үлэни ыытыы уонна Халыматааҕы водохранилище үлэтин сүрүннээһин туһунан иһитиннэрдэ.
2024 сылга мууһу чарааһатыыга халааны утары сэрэтэр үлэлэри толорууга федеральнай бүддьүөттэн 44,9 мөл солк. көрүллүбүтэ, ол иһигэр “Центррегионводхоз” ФГБВУ “Ленарегионводхоз” филиалыгар харыы тахсар Өлүөнэ уонна Халыма учаастактарыгар – 28,1 мөл солк.
“Өрөспүүбүлүкэ өрүстэригэр мууһу чарааһатыы үлэтэ муус барыытын кэмигэр харыы тахсыытын аччатарга, уу кутталлаах таһымҥа тиийбэтин уонна нэһилиэнньэлээх пууннары ууга барыыттан көмүскүүр сыаллаах оҥоһуллар”, — диэтэ Петр Аргунов.
Кини этэринэн, үлэ 8 оройуоҥҥа Өлүөнэ уонна Халыма өрүстэр харыы тахсар 46 учаастактарыгар ыытыллар, ол иһигэр 39 участакка хараардыы – 486 гектарга, мууһу эрбэтии 7 учаастакка – 41 км.
Үөһээ Халыма оройуонугар үлэлэри 4 учаастакка 3 схеманан ыыттылар, хараардыы уопсай иэнэ 31 гектарга тэҥнэһэр. Орто Халыма улууһугар үлэлэри 4 схеманан 5 учаастакка ыыттылар, манна хараардыы 41 гектарга тэҥнэһэр.
“Саха сиринээҕи гидрометеорологияҕа уонна тулалыыр эйгэни кэтээн көрүүгэ управление” тэрилтэ гидрометкиин начаалынньыгын солбуйааччы Вячеслав Шехиров өрүстэр хаһан аһыллалларын уонна 2024 сылга өрөспүүбүлүкэ өрүстэригэр сааскы халаан уутун таһыма төһө буолуон сөбүн туһунан иһитиннэрдэ.
Саха Өрөспүүбүлүкэтин сыыппара сайдыытын уонна инфокоммуникационнай технологияларга миниистирин солбуйааччы Андрей Суслов нэһилиэньэни сэрэтии-биллэрии ситимэ бэлэмин туһунан эттэ.Ону тэҥэ Дьааҥы, Абый, Орто Халыма оройуоннара төһө бэлэмнээхтэрин кэпсээтилэр.
СӨ Ил Дарханын уонна Бырабыыталыстыбатын пресс-сулууспата
Хаартыска: Мария Васильева, СИА
Арассыыйа аармыйатын Киин Академическай тыйаатыра Саха сиригэр кэлиэн иннинэ тыйаатыр дириэктэрэ Милена Авимскаялыын маннык кэпсэппиппит.…
Бүгүн, от ыйын 6 күнүгэр, Таатта улууһун хайысхатынан араас массыына, оптуобус халҕаһалыы субуллар. Манчаары төрүт…
Мэлдьи ахтар-саныыр доҕорбунаан Ньукулайдыын 80-с сыллартан “Кыым” хаһыакка үлэлиэхпититтэн билсибиппит. Хомсомуолга иитиллибит, хомуньуус баартыйа кыһатыгар…
Ураты быһыылаах түргэн мантыы ырысыабынан социальнай ситимнэринэн фудблогер уонна спортсмен Владимир Никитин үллэһиннэ. Өрөбүл күҥҥэ…
Норуот ырыаһыта Сергей Зверев төрөөбүтэ 125 сылынан Сунтаар улууһун Түбэй Дьаарханыгар ыытыллыбыт Ыһыах кыттыылаахтара Ыгыаттаҕа…
Сахабыт сиригэр самаан сайыммытын уруйдуур-айхаллыыр, араас ыһыахтар дьэ бүтэн эрэллэр. Мин эмиэ сааспын баттаһа, биир…