Оскуола үөрэнээччитэ «Дальний Восток — Земля приключений» куонкуруска кыттар

Ньурба 2 №-дээх оскуолатын 9 кылааһын үөрэнээччитэ, «Дальний Восток — Земля приключений» бастыҥ айаҥҥа Бүтүн Арассыыйатааҕы куонкурус кыттыылааҕа Айсен Беленков Саха сирин кэрэтин көрдөрүө.

Кини Саха сирин кэрэ айылҕалаах сирдэринэн, Булууһунан, Туруук хайаларынан айаннарын туһунан видеоролигынан кыттарга быһаарыммыт.

«Мин видеоҕа устуунан дьарыктаммытым үс сыл буолла. Куонкуруска кыттыы — бу Саха сирин кэрэтин дойду үрдүнэн көрдөрүү», — диир кини.

Ахсынньы 30 күнүгэр диэри «Дальнай Восток — Земля приключений»  Уһук Илиҥҥэ бастыҥ айан туһунан Арассыыйатааҕы куонкуруска сайаапкалары ылыы салҕанар. Дьүүллүүр сүбэҕэ 200- тэн тахса үлэ киирбит. Саха сириттэн куонкуруска алта киинэ киирбитэ этиллэр.

Санатар буоллахха, куонкуруһу вице-премьер – РФ Бэрэсидьиэнин Уһук Илиҥҥи федеральнай уокуругун боломуочуйалаах бэрэстэбиитэлэ Юрий Трутнев ис туризмы сайыннарыы туһунан Арассыыйа Бэрэсидьиэнин сорудаҕын толорон көҕүлээбитэ. Бастакы сезон 2022 сыл балаҕан ыйыгар Илин экэнэмиичэскэй пуорум сэттис былаһааккатыгар саҕаламмыта.

Куонкурус сүрүн ис хоһооно — Уһук Илин биир эбэтэр хас да эрэгийиэнигэр сылдьан дьоҕус киинэҕэ (8 мүнүүтэҕэ диэри) кэпсиэхтээххит.  Айаны суотабайга устан ыытыахха эмиэ сөп.

Сайаапкалары ылыы ыам ыйын 1 күнүттэн саҕаламмыта, ахсынньы 30 күнүгэр диэри биэриэххэ сөп. Кыайыылаахтары уонна призердары наҕараадалааһын 2025 сылга олунньуга буолар.

СӨ Ил Дарханын уонна Бырабыыталыстыбатын пресс-сулууспата