Остеопатия — ыарыыны сэрэтэр туһалаах ньыма

Дьокуускай куоракка анал дьупулуомнаах уонча остеопат-быраас баарыттан биирдэстэринэн травматолог-быраас, ортопед, остеопат уонна мануальнай терапевт Иван Александрович Неустроев буолар.

Киниэхэ аҕыйах сеанска сылдьан баран, сис ыарыыта диэни умнубут махталлаах ааҕааччы көрдөһүүтүнэн Иван Александровичтыын көрсөн сэһэргэстибит.

— Кэпсэтиибитин “Остеопатия” диэн тыл тылбааһыттан саҕалаатахха, остео (уҥуох) уонна пат (уҥуох патологията) диэн икки тылтан турар. Мэдиссиинэ бу хайысхатыгар аан бастаан үксүн төбө, илии-атах, сис уҥуохтарын кытта үлэлииллэрэ. Билигин аныгы остеопатия үс сүрүн хайысхалаах:

— уҥуох-сүһүөх — быччыҥы, сүһүөҕү, уҥуоҕу, силгэни кытары үлэ;

— висцеральнай — ис уорганнары, тыҥаны, сүрэҕи кытта үлэ;

— кранио-сакральнай — ньиэрбэ киин систиэмэтин, төбөнү, төбө сииктэрин кытары үлэ.

Остеопатия элбэх ыарыыны быһаарар кыахтаах. Остеопат-быраас организмы биир кэлимсэ көрөн, араас ыарыыны быһаарарга уонна эмтииргэ илии тиэхиньикэтин (пальпация) туһанар. Ол аата, биһиги уҥуоҕу, быччыҥнары, силиини уонна ис уорганнары кытта үлэлээн, организмҥа тахсыбыт кэһиллии бастакы төрүөттэрин суох оҥоробут, организм бэйэтин бэйэтэ эмтэнэр кыаҕын чөлүгэр түһэрэргэ көмөлөһөбүт. Оҕолору, улахан дьону, кырдьаҕастары көрөрбүтүгэр элбэх хайысханы киэҥник ылан (окулист, лор, гинеколог, акушер уо. д. а. быраастары хайысхаларын биир кэлим көрөн) үлэлиибит.

Ыарыы туохтан үөскүүрүй?

— Уопсайынан, остеопатия — ыарыыны сэрэтэр олус үчүгэй ньыма. Ыарыы үөскээтэҕинэ, быраас да, остеопат да тута кыайан эмтээбэт. Ыарыы хайдах үөскүүрүй? Холобур, сүрэх ыарыытыгар тымырдар кыарыыллар, онтон сылтаан быччыҥнар эмсэҕэлииллэр. Инсуллаабыт киһи ньиэрбэтин тканнара өлөллөр, ону кыайан чөлүгэр түһэрбэккин.

Ол иһин, остеопатия ыарыы үөскүү илигинэ эрдэттэн булан, ону сэрэтэр аналлаах. Боростуойдук быһаардахха, киһи этэ-сиинэ күүрэр эбэтэр алҕаска илиитин дуу, атаҕын дуу туохха эрэ күүскэ саайар. Саайбыт, охсуллубут сиригэр хаан мунньустан (гематома) өлөрбүт сирэ көҕөрөр, ол ханнык эрэ кэмҥэ ааһар. Онно рубцовай ткань үөскүүр, ол аата тканнар бэйэ-бэйэлэрин кытары сыстыһан хаалаллар, онтон сылтаан патология баар буолар. Ону кыайан хараххынан көрбөккүн.

Тымырга хаан бөлүөҕэ үөскээһинин (тромбоз) төрүөтэ наһаа элбэх. Элбэхтик хамсамматтан үөскүүр диир тутах. Хаан уратытыттан, быар, эндокриннай систиэмэ уо. д. а. ыарыылартан буолуон эмиэ сөп. Хаан мээнэҕэ бөлүөхсүйбэт. Ким эрэ элбэхтик уута иһиҥ, ким эрэ тэтиҥ хатырыгыттан чэйдэ оҥостуҥ, кардиомагнилла, аспиринна иһиҥ диэн сүбэлиэ.

Туох кыһалҕалаахтар кэлэллэрий?

— Миэхэ сүрүннээн саҥа төрөөбүт, 3–5 саастаах уонна улахан кылаас оҕолорун аҕалаллар. Төрүүр дьахтар ыараханнык оҕолонон, саҥа киһи туох эрэ эчэйиилээх буоллаҕына, тута аҕалалларыгар сүбэлиибин. Тоҕо диэтэххэ, мэдиссиинэҕэ кыра эчэйиини кыайан көрүө суохтарын сөп. Оттон биһиги илиибитинэн төбөтүн тутан-хабан, ханна туох күүрүү, ыгыллыы баарын билэбит. Ити туох да дьиктитэ суох. Киһи этэ-сиинэ барыта хамсыахтаах эрээри ханна эрэ эчэйиилээх, эбэтэр хамсыыр хайысхата уларыйбыт, эбэтэр олох да хамсаабат буолар. Дьэ, ону хамсыыр оҥоро сатыыбыт. Биһиги сүрүн сорукпут ол.

Билигин 3–5 саастаах оҕолорго ЗПРР (бытааннык, хойут саҥараллар) ыарыы элбээтэ. Саҥарар дьоҕура сайдыбатах эбэтэр бытааннык сайдар оҕолор биир саастыылаахтарын кытары кыайан кэпсэппэттэр. Кинилэр тылларын саппааһа аҕыйах, болҕомтолоро суох, өйдүүр дьоҕурдара бытаан сайдыылаах уо. д. а. Ол төрүөтэ эмиэ элбэх, ол иһигэр, мэйии эчэйиитэ, инпиэксийэлэр уо. д. а. буолуохтарын сөп.

Аны аһара күүрэн сылдьар, олус элбэх хамсаныылаах (гиперактивнай) оҕолору эмиэ аҕалаллар. Гиперактивность сүрүн төрүөтүнэн мэйии “аһылыгын” кэһиллиитэ буолар (хаан эргиирэ кислород, глюкоза, туһалаах бэссэстибэлэр тымыр нөҥүө ааһалларын хааччыйыахтаах). Биһиги оҕо төбөтүн илиибитинэн бигээн, уҥуохтарын хамсыыр гына оҥордохпутуна, мэйии “аһыыра” тупсар.

Онтон улахан саастаах оҕолору аҕалар төрүөттэринэн быһыы-таһаа, сис тоноҕоһо уларыйыыта (сколиоз) буолар. Ол гынан баран, биһиги ити түгэҥҥэ эмтиир физкултуура (ЛФК) быраастарын кытары үлэлиибит. Тоҕо диэтэххэ, аҥаардас остеопатиянан кэһиллиини көннөрөн кэбиспэккин. Биһиги күүрбүт миэстэлэри эрэ суох оҥоробут.

Кырдьаҕастар уонна хамсаммакка олорон эрэ үлэлиир дьон элбэхтик кэлэр. Тоҕо диэтэххэ, кинилэр хамсамматтарыттан сылтаан, бастатан туран, систэрэ ыалдьар. Төһөнөн элбэхтик хамсыыгын, оччонон тканнар элбэх “аһылыгы” ылаллар. Төһөнөн хамсаабаккын да, этиҥ-сииниҥ түллэр-ыгыллар. Онтон сылтаан доруобуйаҕар атын кыһалҕалар үөскүүллэр: мэйии эргийэр, төбө ыалдьар, хаан баттааһына үрдүүр уо. д. а.

Ис тэһэҕэһэ (грыжа) — туспа ыарыы буолбатах, ханнык эрэ ыарыы содула. Киһи аан бастаан протрузияланар (сис тоноҕоһун ыарыыта саҕаланар түһүмэҕэ). Ол аата сис тоноҕоһун икки ардыларынааҕы диискэ хатар, имигэһин сүтэрэн, кытаатан хаалар. Салгыы хаппыт диискэ хайа баран, гель курдук ядро алдьаммыт хайаҕаһынан таһыгар тахсар. Онуоха киһи төбөтүн кытта үлэлээн, уҥуохтарын хамсыыр оҥордохпутуна, “аһылыга” тупсар.

Иван Неустроев киниэхэ доруобуйатын көрдөрүнэ эбэтэр туох эмэ кыһалҕаланан сүбэ-ама ыла кэлбит киһини куруук үөрэ-көтө көрсөр. Кинилэр үгүстэрэ биир сеанстан үтүөрэн хаалыахтарын баҕаралларын билэр. Ол иһин: “Мин эйигин сибилигин эмтиибин, тута үтүөрдэбин”, — диэн хаһан да мэктиэлээбэт, сиһилии быһаарар, сэрэтэр. Кини этэринэн, сэдэх эрэ түгэҥҥэ киһи тута үтүөрүөн сөп.

“Холобур, кыһалҕалаах кэлбит киһи ханнык эрэ сүһүөҕэ тахса сылдьарын киллэрэн кэбистэхпинэ, тута үчүгэй буолар буоллаҕа. Миэхэ кэлбит киһи чэпчээн, үөрэн-көтөн бардаҕына, идэбэр махтана саныыбын”, — диэн идэтин сөпкө талбытын туһунан этэр.