Паром сырыыта саҕаланна

Үйэлэр анараа өттүлэригэр Дьокуускай куорат кытылга туруоҕуттан саас аайы биир кыһалҕа мэлдьи үөскүүр – Өлүөнэ өрүһү уҥуордааһын.

Илин эҥээри кытта быстыбат ситим олохтооһун кыһалҕатын өссө XIX үйэҕэ өйдөөн, кытыл сулууспатын тэрийбиттэрэ. Бастаан мас тыыларынан тиэйэллэрэ, онтон улахан баарсалар, паромнар сылдьар буолбуттара. Ол эрэн, тырааныспар кыаҕа төһө да улааттар өр сыллар устата, сезон саҕаланыыта паромунан тиэйии куруутун аймалҕаннаах, элбэх сыраны-сылбаны, ньиэрбэни сиир тэрээһин этэ. Икки-үс сыл эрэ анараа өттүгэр кытылга бэрээдэги олохтооһуҥҥа күттүөннээх үлэ ыытыллан барбыта диэтэхпинэ, арааһа, алҕаһаабатым буолуо.

БЭРЭЭДЭК МААНЫ

Быйыл Дьокуускай уонна Аллараа Бэстээх туһаайыытынан паром сырыыта ыам ыйын 25 күнүттэн саҕаланна. Кытылга хайдах быһыы-майгы олохтоммутун, тиксэр сир үлэтэ хайдах быһыылаахтык тэриллибитин көрө өрөбүл күн тиийэ сырыттым. Аныгылыы тэриллибитин өссө көрө илик этим, онон барытын саҥалыы көрөр буолан, омуна суох, сөҕө-махтайа ылынным.

Бастатан туран, киин суолтан кытылга киирэр суол лаппа тупсубут, биир өттүттэн киирии эрэ баар, кытылтан тахсарга туспа суол баар. Паромҥа тиийэргэ анаммыт алта балаһа тус-туспа быанан араарыллыбыттар, хас биирдиилэрин иннигэр светофор уонна шлагбаум турар. Кытылга чугаһаан иһэн репродуктор нөҥүө биллэриини истибитим: “Төрдүс нүөмэрдээх тиксэр сиргэ турар паромҥа киирии салҕанан бара турар!” Биэс балаһа сабыылаах турар, арай төрдүс балаһа иннигэр туора мас өрө турбут, светофор күөх уота тыкпыт. Балаһа түгэҕэр кэ­­тиир пуун үлэһиттэрэ тураллар. Кинилэргэ тиийэн ыйытала­һааччы буоллум.

ТУПСАРЫЫ ҮЛЭТЭ САЛҔАНАР

Аллараа Бэстээххэ АЯМ тутааччыларын Ассоциацията таһаҕас тиэйэр массыыналар тиксэр сирдэрин, пассажирдар күүтэр сирдэрин оҥорууну түмүктээн эрэллэрэ биллэр. Мэҥэ Хаҥалас улууһун дьаһалтата кытылга киирэр суолу тупсарыы үлэтин эмиэ үмүрүтэн эрэр, бу үлэҕэ 61,2 мөл. солк. көрүллүбүт. Аны бу сайын терминал нөҥүө паромунан айан төлөбүрүн ылыы тургутуллуохтаах.

ТӨЛӨБҮР АРААС БУОЛБУТ

Ааспыт сылы кытта тэҥнээтэххэ, кыра ыйааһыннаах тыраа­ныспары тиэйии сыаната үрдээбит. СӨ Сыана бэлиитикэтигэр кэмитиэтэ быһааран этэринэн, бу сылтан ыла тырааныспар ыйааһыныттан буолбакка, паром палубатыгар сабардыыр миэс­тэтиттэн төлөбүрү ааҕыыга көһүү саҕаланыахтаах. Бу курдук суоттааһынтан сылтаан легковой массыынаны тиэ­йии төлөбүрэ үрдээбит. Таһаҕас тиэйэр улахан массыыналары туоратыы төлөбүрэ 2022 сыл таһымыгар хаалбыт.

Владимир диэн ааттаах эдэр уол бэйэтин санаатын үллэстэр:

– Быйылгы сезон арыллыыта ааспыт сыллар­дааҕар чуумпу соҕус буолла. Киһи сөҕүөх, туоруур массыына наһаа элбэҕэ суох, ааспыт сылы кытта холоотоххо, аҕыйах да диэххэ сөп. Сарсыарда син балачча массыына ааспыта эрээри, маннык, паром тута туол­бат түгэннэрэ эмиэ бааллар. Үс хонук устата “накопитель” ыы-быччары туолар түгэнэ суоҕа. Аахсыы, быһа киирэ сатааһын суох буолбута ­ыраатта.

“Массыына аҕыйах” диэн этиини кытта Алексей, паромҥа киирбит массыыналары аттаран туруоруунан дьарыктана сылдьар уол, сөпсөспөт:

– Маҥнайгы күн уһун уочарат субуруйбута, билигин даҕаны паром киһи көрүөх бэтэрээ өттүгэр туолар. Ордук элбэх массыына анараа кытылга мунньус­тар, түүннэри турааччылар бааллар. Ол эрэн, бэрээдэк мааны, урукку курдук дьии­кэй көстүүлэр суох буолбуттара ыраатта.