Пассажир таксыы массыынатын алдьаппыт

ИДьМ Дьокуускайдааҕы отделын дьуһуурунай чааһыгар таксыы суоппара биллибэт эр киһи кини массыынатын алдьаппытын туһунан иһитиннэрбит. Бу туһунан СӨ ИДьМ пресс-сулууспата суруйар.

Холуобунай ирдэбил үлэһиттэрэ үлэтэ суох 33 саастаах киһи уорбаланарын быһаарбыттар.

Быһаарыллыбытынан,  эмсэҕэлээччи таксыылыы сырыттаҕына сакаас киирбит. Пассажир итирик туруктаах эбит, айаннаан иһэн харчыта суоҕун эппит. Салгыы суоппар кинини кытта кыбартыыраҕа тахсан харчытын ыларыгар эппит. Онуоха таксыыс сөбүлэспэтэх уонна эр дьон этиспиттэр. Пассажир массыынаттан тахсан иннинээҕи тааһы хаста даҕаны саайан алдьаппыт уонна куоппут.

Быһылаанынан холуобунай дьыала тэриллибит.