Пекиҥҥэ — байыаннай параат

Балаҕан ыйын 3 күнүгэр Пекиҥҥэ Тяньаньмэнь болуоссакка Япония капитуляциялаабытын кэннэ Иккис аан дойду сэриитэ бүппүтэ 80 сылынан өрөгөйдөөх байыаннай параат буолла. Манна аан дойду 26 лиидэрин иһигэр РФ бэрэсидьиэнэ Владимир Путин сырытта.

Тяньаньмэнь болуоссатыгар сүүһүнэн аэрокосмическай уонна киберпространственнай тиэхиньикэтин, ол иһигэр сүүһүнэн истребителлэри, бомбардировщиктары, сэрии сэбин адьас саҥа көрүҥнэрин таһааран көрдөрдүлэр. Көстүбэт FH-97 “беспилотник” кытта баар, бу сэп пилоттаах сөмөлүөтү кытта тэҥҥэ көтүһэр, диэн иһитиннэрэр РИА-Сонуннар.

Параакка убаҕас оттугунан барар стратегическай ядернай аракыата аан бастаан таҕыста. Аракыата Сир хайа баҕарар муннугар тиийэр, онон суостаах буолан, аан дойдуга эйэни уонна куттал суох буолуутун хааччыйар кыахтаах диэн этиллэр.

Кытай лиидэрэ Си Цзиньпинь Иккис аан дойду сэриитин сүрүн кыайыылаахтарынан Арассыыйа уонна Кытай буолаллар диэн эттэ.