Перинатальнай кииннэр саҥа тэриллэринэн хааччылыннылар

Саха сиригэр «Дьиэ кэргэн» национальнай бырайыагынан  437 мэдиссиинэ аныгы тэрилэ кэллэ.

Арассыыйа бэрэсидьиэнэ Владимир Путин көҕүлээбит «Дьиэ кэргэн» национальнай бырайыагынан Саха сирэ  437  мэдиссиинэ тэрилин ылла диэн өрөспүүбүлүкэ доруобуйа харыстабылын министиэристибэтэ иһитиннэрэр.

Быйыл М.Е. Николаев аатынан өрөспүүбүлүкэтээҕи 1-кы №-дээх килиниическэй балыыһаҕа-Национальнай кииҥҥэ уонна Өрөспүүбүлүкэтээҕи килиниическэй балыыһаҕа баар Перинатальнай кииннэргэ саҥа тэриллэри ыллылар.

Дьахталларга уонна саҥа төрөөбүт оҕолорго аналлаах реанимацияҕа, эпэрээссийэлиир блоктарга, төрүүр дьиэлэргэ 188 аныгы тэрил кэллэ. Ийэлэргэ уонна оҕолорго олоҕу быыһыыр аныгы технологиялар ыарахан түбэлтэлэри сэрэтэллэр, номнуо үлэлии тураллар. Алдан, Хаҥалас, Ньурба улуустарыгар аныгылыы тэриллэринэн хааччыллыбыт дьахтар консультациялара аһылыннылар, онно 249 саҥа мэдиссиинэ  тэрилэ үлэҕэ киирдэ.

«Саҥа  гинекологическай кириэһилэлэри уонна хат дьахталлар  доруобуйаларын чинчийэр диагностическай тэриллэри ыллылар. Ол иһигэр кольпоскоптар, электрокардиограф, хаан баттааһынын монитора, эспиэр кылаастаах УЗИ-аппаратуура», — диэн доруобуйа харыстабылын министиэристибэтин кылаабынай акушер-гинеколога Лилия Анкушева эттэ.

Быйылгыттан олоххо киирбит «Дьиэ кэргэн» национальнай бырайыак ийэ уонна оҕо, улаатан эрэр оҕо доруобуйатын, ол иһигэр төрүүр-ууһуур кыаҕы харыстыыр ​​соруктаах. Бырайыак соруктарыгар дьахтар консультацияларын ситимнэрин кэҥэтии уонна перинатальнай кииннэри, оҕо балыыһаларын саҥардыы киирэллэр.