ПМЭФ: Саха сиригэр социальнай гаастааһын бырагыраамата туолуутун ырыттылар

Петербурдааҕы норуоттар икки ардыларынааҕы экэнэмиичэскэй пуорум иитинэн Ил Дархан Айсен Николаев «Газпром инвест» ХЭУо генеральнай дириэктэрэ Вячеслав Тюрины кытта көрүстэ.

Оробуочай көрсүһүү кэмигэр гаастааһын бырагырааматын олоххо киллэрии уонна кэҥэтии боппуруостарын ырыттылар.

Айсен Николаев, “Сибиир күүһэ” гаас ситимэ ааһар сиригэр турар өрөспүүбүлүкэ соҕуруу оройуоннарын нэһилиэнньэлээх пууннарын гаастааһынын сайыннарар инниттэн, 2025 сылга диэри СӨ гааһынан хааччыйыы уонна гаастааһыны сайыннарыы бырагыраамата бигэргэммитин бэлиэтээтэ. Бырагыраама чэрчитинэн Өлүөхүмэ, Ленскэй, Алдан, Нерюнгри улуустарын 30 нэһилиэнньэлээх пуунугар гаас киллэрэр былааннанар.

Санатан эттэххэ, Саха сирэ Уһук Илиҥҥэ социальнай газификация көрдөрүүтүнэн лиидэринэн буолар, оттон дойдуга бэһис миэстэҕэ сылдьар. Былырыын 336 км ситим тардыллыбыта, бу 2021 сылы кытта тэҥнээтэххэ 25 төгүл элбэх.

Бырагырааманан күөх төлөҥҥө 2800 дьиэ холбонно, сыл түмүктэниэр диэри өссө 1800 дьиэҕэ киллэриэхтэрэ. 2030 сылга диэри Саха сирин олохтоохторун 15,5 тыһ. дьиэтигэр гаас киллэрэри былаанныыллар.

Ил Дархан уонна Бырабыыталыстыба пресс-сулууспата.