Полицейскайдар тыаҕа муммут уонна суолга хаайтарбыт ыалы быыһаабыттар

Ньурба улууһугар полиция үлэһиттэрэ Саҥа дьыл түүнүгэр тыаҕа муммут уонна суолга хаарга хаайтарбыт массыыналаах ыалга көмө оҥорбуттар.

2026 сыл тохсунньу 1 күнүгэр полиция учаастактааҕы боломуочунайа Владимир Иванов уонна быстах кэмҥэ тутар изолятор полиция үлэһитэ Аян Иванов Чуукаар сэлиэнньэтин патруллуу сылдьан, ойуур суолугар массыына хаарга хаайтарбытын  туһунан иһитиннэриини ылбыттар. Ньурбаттан Малдьаҕар сэлиэнньэтигэр айаннаан испит кэргэнниилэр суолтан мунан, кыл мүччү биир кэлим диспетчерскай сулууспаҕa эрийбиттэр.

Полицейскайдар Өҥөлдьө нэһилиэгин дьаһалтатын исписэлииһэ Дьулустаан Семеновтыын, суоппар хараҥаҕа уонна тумаҥҥa суол арахсыытыгар муммут буолуон сөп диэн сабаҕалаабыттар. Кинилэр быһылаан буолбут сиригэр учаастактааҕы полицейскай чааһынай массыынатынан барбыттар.

Быһылаан буолбут сиригэр тиийэн, полиция үлэһиттэрэ хаарга батыллан турар массыынаны булбуттар. Массыына хаайтарбыт сиригэр суотабай сибээс суоҕа биллибит. Балаһыанньаны халлаан күүскэ тымныйбыта уустугурдубут — салгын температурата -44С кыраадыс эбит. Полицейскайдар хаары ыраастаан,  массыынаны суолга соһон таһарбыттар. Кэргэнниилэр этэҥҥэ Ньурбаҕа тиийбиттэр.