«Пушкинскай каартанан» 187 тыһыынча билиэт атыыламмыт

2021 сылтан 14-22 саастаах эдэр дьоҥҥо “Пушкинскай каарталары” биэрии саҕаламмыта. Саха сирин култуура тэрилтэлэрэ «Пушкинскай каарта» үлэлиэҕиттэн  бу бырагырааманан 187,7 тыһыынча билиэти, ол иһигэр 2023 сылга 118,7 тыһыынча билиэти атыылаатылар.

Бу каартанан оҕолор  түмэллэргэ, тыйаатырдарга, бибилэтиэкэлэргэ, кэнсиэртэргэ, быыстапкаларга, киинэҕэ босхо сылдьаллар.  “Пушкинскай каарта” иһигэр  5 тыһыынча солкуобай угулла сылдьар.

2023 сылга «Пушкинскай каартанан» саамай элбэхтик Национальнай ойуулуур-дьүһүннүүр түмэлгэ, Бүлүүтээҕи кыраайы үөрэтэр уонна Намнааҕы устуоруйа-этнография түмэллэригэр сылдьыбыттар.

Санатар буоллахха, Дьиэ кэргэн сылыгар 7-13 саастаах оҕолорго эмиэ «Пушкинскай каарта» курдук үлэлиир «Тютчевскай каартаны» киллэрэргэ этии киирбитэ. Оччотугар дьиэ кэргэн чилиэннэрэ бары култуура тэрилтэлэригэр күргүөмүнэн сылдьар, сынньанар кыахтаныахтара этэ.