Пушкинскай каартаны биэнсийэлээхтэргэ тарҕатыахтарын баҕараллар

Арассыыйа үрдүнэн 14-22 саастаах эдэр дьоҥҥо култуура таһымын үрдэтэр соруктаах Пушкинскай каарта олохтоммута. Маннык каарталаах ыччат тыйаатырга, түмэлгэ, филармония кэнсиэртэригэр босхо сылдьар кыахтанар. Каарта сыллааҕы лимиитэ — 5 тыһ. солк.

Санкт-Петербург сокуону ылынар дьокутаата Павел Крупник РФ култуураҕа миниистирэ Ольга Любимоваҕа Пушкинскай каартаҕа биэнсийэлээхтэри киллэрэр туһунан этии киллэрбитэ. Бу туһунан «Парламентская газета» суруйар. Бэлиэтээн суруйдахха, тыйаатырга, түмэлгэ аҕам саастаах дьон бэрт көхтөөхтүк сылдьар. Онон кинилэргэ маннык көмө каарта олус туһалаах буолуо эбит.

Каартаны Дьокуускайга ханна оҥотторуохха сөбүй? «Госуслуги» портал нөҥүө эбэтэр СӨ Национальнай бибилэтиэкэтигэр пааспардаах, СНИЛС докумуоннаах тиийэн сайабылыанньа биэрэн, 14-22  саастаах эдэр дьон оҥотторуохтарын сөп.