Путин дьиэ кэргэн уонна демография бэлиитикэтин эйгэтигэр сорудахтары биэрдэ

Судаарыстыбаннай демографическай уонна дьиэ кэргэн бэлиитикэтин олоххо киллэрэр Сэбиэт мунньаҕын түмүгүнэн, Владимир Путин муус устар 1 күнүгэр диэри дьиэ кэргэҥҥэ хайысхалаах эйгэни сайыннарыыга уонна үгэс буолбут сыаннастары сөргүтүүгэ оробуочай бөлөҕү тэрийэргэ дьаһал биэрдэ диэн РИА-Сонуннар иһитиннэрэр.

Ол кэнниттэн бэс ыйын 1 күнүгэр диэри бэрэсидьиэҥҥэ маннык сорудахтар олоххо киириилэрин туһунан отчуот бэриллиэхтээх:

-Угуйукка элбэх оҕолоох дьиэ кэргэн сыаннастарын тарҕатыыга этиилэри оҥоруу;

— Оҕолоох ыаллары өйүүр миэрэлэри сырдата турар мобильнай сыһыарыыны оҥоруу;

-Үһүгэр диэри саастаах оҕолорго дьааһыла бөлөхтөр (чааһынайдары киллэрэн туран) төһө наадалаахтарын чинчийэн баран, олору сайыннарар, өйүүр миэрэлэри ылыы;

-Сэттэ сааһыгар диэри оҕолоох дьиэ кэргэттэргэ олорор усулуобуйаларын тупсарыыга госбырагыраамалары бэлэмнээһин;

— Оҕо ахсаана элбээн истэҕин аайы дьиэ кэргэн биир судаарыстыбаннай бырагырааматтан атыҥҥа көһөр кыаҕын хааччыйыы;

— Түөрт уонна онтон элбэх оҕолоох ыалларга 450 тыһыынча солкуобайга диэри ипотеканы толору эбэтэр сорҕотун төлүүр кыаҕы көрүү;

— Хат дьахталлар оҕолонор быһаарыыны ылыналларыгар көмөлөһөр туһуттан төлөбүрү үрдэтэр кыаҕы чинчийии;

— Оҕолоох үлэһит дьиэ кэргэттэри өйүүр дьаһаллар олоххо киирбит уопуттарын ырытан тарҕатыы;

— Судаарыстыбаннай үрдүк үөрэх кыһаларын бүтэрэр омук дьонун үлэнэн хааччыйар механизмнарын тупсарыы;

Маны таһынан, балаҕан ыйын 1 күнүгэр диэри РФ Билимин  уонна үрдүк үөрэххэ министиэристибэтэ үөрэнэ сылдьан оҕоломмут устудьуоҥкаларга табыгастаах усулуобуйаны тэрийэллэрин туһунан мэктиэ суруктары оҥорон үөрэх кыһаларыгар ыытыаҕа.