«Ретрограднай» Меркурий кэмэ сарсын түмүктэнэр

24.04.2024, 19:46

Хаартыска: ДоброЖурнал.

Бөлөххө киир:

Сарсыҥҥыттан, муус устар 25 күнүттэн «ретрограднай Меркурий» дьайыыта бүтэр. Ол аата тугуй? Дьоҥҥо хайдах дьайарый?

Астрологияҕа «ретрограднай Меркурий» көстүүтэ диэн — ол аата бу планета төттөрү, кэннинэн барыыта ааттанар. Дьиҥинэн, халлаан эттигэ, бүтүн планета иннин диэки баран иһэн, тохтоон баран, төттөрү барбат буоллаҕа. Ол эрээри, бу кэмҥэ Сиртэн көрдөххө, чахчы төттөрү баран иһэр курдук көстөр, ол эбэтэр, харах баайыыта (оптическая иллюзия) буолар.

Меркурий бэйэтин орбитатынан Сирдээҕэр түргэнник, Күнү 88 хонук иһигэр эргийэр. Саамай түргэн, саамай кыра, Күнтэн саамай чугас уонна итии планета буолар. Онтон Сиргэ чугаһыыр, алтыһар кэмнэригэр, бытааран ылар, онуоха төттөрү баран иһэр курдук көстөр.

Бу кэмҥэ араас быһылааннар, алдьаныылар буолаллар диэн этэллэр. «Барытыгар ретрограднай Меркурий буруйдаах» диэн дэлэҕэ уос номоҕо оҥостуохтара дуо? Бу кэмҥэ тиэхиньикэ алдьанар, дьон сыһыана буорту буолар, дьыала-куолу сатаммат, араас быһылааннар буолаллар үһү.

Этэр эттэҕинэ, эмиэ да бу кэнники кэмҥэ Саха сиригэр элбэх быһылааннар, баһаардар буоллулар буолбаат? Онно барытыгар Меркурий буруйдаах дуо? «Буруй эрэ Моттойоҕо» диэн өс хоһоонун курдук буолаарай? Дьон гороскопка наһаа итэҕэйэр. Аны эппиэтинэһи бэйэҕэ ылынары сөбүлээбэттэр, ким эрэ, баҕар, куйаарга баар планета да буруйдаах буоллун ээ.

Дьиҥэ, атын планеталар — Марс, Юпитер, Уран, Нептун эмиэ «ретрограднай» буолан ылаллар. Ол эрээри, Меркурий эрэ куһаҕаннык дьайыан сөп диэн астрологтар этэллэр.

Астрологияҕа Меркурий өй-санаа, саҥа, алтыһыы, үөрэнии, кэпсэтии, айан хайысхаларыгар «эппиэттээх». Онон «ретрограднай» кэмигэр бу эйгэлэргэ ситиһии суох. Саҥа саҕалааһын да табыллыбат. Былыргы Рим мифологиятыгар Меркурий — халлаан таҥаратын Юпитер уола, атыы-эргиэн, дохуот, баай-дуол таҥарата. Онон «төттөрү» барар кэмигэр бу эйгэлэргэ харгыстар үөскүүллэр.

Бу кэмҥэ сэрэхтээх буолуохха, улахан дьыалаҕа ылсыбакка, барытын суоттаан-учуоттаан оҥоруохха наада.

2024 сылга Меркурий хаһан «ретрограднай» буолар?

Муус устар 1-25 күннэригэр;

атырдьах ыйын 5-28 күннэригэр;

сэтинньи 26-ахсынньы 15 күннэригэр.

«Ретрограднай» Меркурий кэмэ сарсын түмүктэнэр

Сообщить об опечатке

Текст, который будет отправлен нашим редакторам: