Россельхознадзор: “Докумуоннаах буолуохтаах”

Быйыл тохсунньу ыйтан ахсынньы 2 күнүгэр диэри Россельхознадзор Амур уобалаһыгар уонна Саха Өрөспүүбүлүкэтигэр управлениетын иниспиэктэрдэрэ СӨ ИДьМ Госавтоиниспиэксийэтин ДПС сулууспатын үлэһиттэрин кытта Дьокуускай, Нерюнгри уонна Мииринэй куораттардааҕы стационарнай пуостарга бэрэбиэркэ ыыттылар.

Ол курдук, сүөһүнү-аһы уонна тыа хаһаайыстыбатын бородууксуйатын көҥүлэ суох илдьиини-аҕалыыны бэрэбиэркэлиир 50 эриэйдэҕэ кытыннылар.

Бу ыйыллыбыт кэмҥэ иниспиэктэрдэр 6 туонна балык , 185 киилэ үүт ас уонна 44 киилэ эт бородууксуйатын туттулар. Ону тэҥэ Новосибирскай уонна Кемеровскай уобаластартан аҕалыллыбыт 59 подсадной кус, Новгородскай уобаластан кэлбит 2 альпак туох да арыалыыр докумуона суох кэлбиттэрэ быһаарыллыбыт.

Эриэйдэлэр кэмнэригэр сэрэтэр үлэ күүскэ барбыт. Чуолаан, суоппардарга бэтэринээрийэ сокуоннаһын уонна ирдэбиллэрин быһаарбыттар. Бу сүөһүнү-сылгыны, тыа хаһаайыстыбатын бородууксуйатын тиэйиигэ сыһыаннаах.

Тиэйээччилэртэн хайаан да докумуоннаах буолаллара ирдэнэр. Хайа сиртэн, туох көрүҥү тиэйэн иһэллэригэр. Ону тэҥэ аҕалар сирдэрин эпизоотическай өттүнэн туругун туһунан билиэхтээхтэр. Онон ааспыт сэтинньи ыйга 100 тахса суоппарга өйдөтөр-сэрэтэр үлэни ыытан, кэпсэппиттэр.