Россия Федерациятыгар Аҕалар күннэринэн Саха Өрөспүүбүлүкэтин Ил Дархана А.С.Николаев эҕэрдэтэ

Ытыктабыллаах Саха сирин олохтоохторо!

Саха Өрөспүүбүлүкэтин салалтатын уонна тус бэйэм ааппыттан Россия Федерациятыгар Аҕалар күннэринэн ис сүрэхпиттэн эҕэрдэлиибин!
Дойду баһылыга Владимир Владимирович Путин ыйааҕынан олохтоммут оҕо дьылҕатыгар, гражданин уонна патриот быһыытынан сүһүөҕэр турарыгар, кэнэҕэскитин оҕо бэйэтэ амарах аҕа, дьиэ кэргэн, өрөспүүбүлүкэ, дойду эрэллээх эркинэ буола улаатарыгар аҕа сүҥкэн суолтатын кэрэһилиир бүтүн норуот бырааһынньыга биһиэхэ дьоһун суолталаах.
Бу күн ураты махталбытын аҕаларбытыгар аныыбыт. Аҕа – булар талар тутаах киһи, кэтит хахха, бигэ тирэх, эрэллээх доҕор, мындыр сүбэһит, олох-дьаһах ымпыктарыгар-чымпыктарыгар бастакы уһуйааччы. Аҕа тус холобурунан оҕолорун дьулуурдаах, биир сүрүннээх, бэриниилээх, күүстээх санаалаах буоларга, тулалыыр эйгэни кэрэхсииргэ, төрөөбүт дойдуну таптыырга уһуйар. Ол барыта олоххо көрсөр уустук түгэннэри туоруурбутугар дьоһун төһүү буолар.
Бүгүн  Саха сирин үгүс уолаттара дойдуларын кэскилин көмүскүү анал байыаннай дьайыы бара турар сиригэр-уотугар хорсуннук сэриилэһэ сылдьаллар. Саха сирин бары олохтоохторо биир дойдулаахтарын хорсун быһыыларынан киэн туттуохтарын тутталлар! Саха сириттэн тоҕус буойун – Александр Колесов, Филипп Евсеев, Алексей Неустроев, Дмитрий Егоров, Игорь Юргин, Николай Соболев, Николай Евдокимов, Родимир Максимов, Дмитрий Куценко Россия дьоруойун үрдүк аатын сүкпүттэрэ биһиги аҕаларбыт хайдахтаах курдук бастыҥ уолаттары иитэн-такайан таһаарбыттарын туоһулуур.
Ийэ дойдутун көмүскүүр, Анал байыаннай дьайыы хонуутугар бойобуой соруктары толоро сылдьар хас биирдии киһи биһиэхэ – дьиҥнээх дьоруой.
Биһиги өрөспүүбүлүкэбитигэр дьиэ кэргэни өйүүргэ эрэ буолбакка, дьоҥҥо-сэргэҕэ аҕа үрдүк аатыгар ытыктабыллаах сыһыаны күүһүрдэргэ үгүс болҕомто ууруллар. Россияҕа Дьиэ кэргэн, Саха сиригэр Оҕо саас сылларыгар оҕону иитиигэ ураты үтүөлэрин, өрөспүүбүлүкэ уопсастыбаннай олоҕор дьоһун кылааттарын иһин “Ытык Аҕа” бэлиэнэн сыл ахсын урукку курдук үс оннугар алта аҕаны наҕараадалыырга быһаарыллыбыта элбэҕи этэр. Чурапчы улууһун Үрүҥ Күөл с. олохтооҕо, уон үс оҕолоох, уон сэттэ сиэннээх уонна сүүрбэ алта хос сиэннээх үлэ уонна тыыл бэтэрээнэ Дмитрий Лукин; Бүлүү улууһун Тааһаҕар сэлиэнньэтин олохтооҕо, биэс оҕо амарах аҕата, уон биэс сиэн оҕо эһэтэ Павел Харлампьев; Горнай улууһун Орто Сурт сэлиэнньэтиттэн бастыҥ уопсастыбанньык, урбаанньыт, уһуйааччы, аҕыс оҕо аҕата Виталий Ильюхин Россияҕа бэлиэтэнэр Аҕа күнүгэр түөскэ анньыллар бэлиэни уонна 100 тыһыынча солкуобай суумалаах төлөбүрү ылар чиэскэ тигистилэр.
Дьиэ кэргэн аҕа баһылыктара өрөспүүбүлүкэ уопсастыбаннай –бэлитиичэскэй олоҕор көхтөөхтүк кытталлар, үүнэр көлүөнэни иитиигэ туһаайыллыбыт бырайыактары көҕүлүүллэр. Аҕалар көҕүлээһиннэринэн ыытыллар “Аҕа күрэҕэ”, “Аҕабын кытта бииргэ” далааһыннаах өрөспүүбүлүкэтээҕи куонкурустар хабар иэннэрэ кэҥиир, кыттыылаахтарын ахсаана улаатар.
Күндү аҕалар! Дьиэ кэргэн бигэ туруга, уйгута эһигиттэн тутулуктаах, бигэ олохтоох ыал – өрөспүүбүлүкэ, дойду сайдар мэктиэтэ. Чугас дьоҥҥут тапталлара, ытыктабыллаах сыһыаннара эһиэхэ саамай күндү наҕараада буолуохтун!
Эһиэхэ чэгиэн доруобуйаны, уҕараабат эрчими, ситиһиини, табыллыыны, дьолу, уйгуну, эйэни, бары үтүөнү баҕарабын.

Саха Өрөспүүбүлүкэтин Ил Дархана А.С. Николаев