«Ростех» бастакытын дифтерия, столбняк уонна коклюш утары улахан дьоҥҥо вакцинаны оҥордо

«Ростех» госкорпорациятын «Нацимбио» холдиҥҥа улахан дьоҥҥо анаан дифтерияны, столбнягы уонна коклюш ыарыыны утары бастакы комбинированнай вакцинаны оҥордулар.

Килиниичэскэй чинчийиилэр түмүгүнэн, саҥа вакцина киһи доруобуйатыгар куттала суоҕун уонна олус туһалааҕын дакаастаатылар. Препараты РФ Доруобуйа харыстабылын министиэристибэтигэр ЕЭС быраабылатыгар сөп түбэһиннэрэн регистрациялыырга бэрилиннэ.

Вакцина аАКДС-М кыра кээмэйинэн дифтериялаах уонна столбняктаах анатоксин эттиктээх, ону таһынан коклюшнай компоненнаах. Итинэн сибээстээн, бу препарат көмөтүнэн 18 саастарын ааспыт дьону ревакцинациялыырга туһаныахха сөп.

Саҥа вакцина килиниичэскэй чинчийиилэрэ 60-гар диэри саастаах барыта 436 баҕалаах дьон ортотугар Арассыыйатааҕы билим кииннэрин баазатыгар ыытыллыбыт. Биир ыйынан кыттааччылар үксүлэригэр дифтерия, столбняк уонна коклюш ыарыы утары көмүскүүр иммунитет үөскээбит.

Килиниичэскэй быраактыкаҕа вакцина регистрацияламмытын уонна серийнэй оҥорон таһаарыытын кэннэ туһаныллара былааннанар. Саҥа препараты Пермь куорат собуотугар оҥоруохтара.