“Саахалы туоратар-чөлүгэр түһэрэр бастыҥ силиэсэр” аатын ким ылыаҕай?

Бүгүн Дьокуускайга Очиченко уулуссаҕа турар “Дьокуускайдааҕы хомунаалынай-тутуу техникумун” базатыгар идэни дэгиттэр баһылааһыҥҥа анаммыт өрөспүүбүлүкэтээҕи “Идэтигэр бастыҥ” куонкурус “Саахалы туоратар-чөлүгэр түһэрэр бастыҥ силиэсэр”номинациятыгар күрэхтэһии буола турар.

Бастыҥ силиэсэри быһаарар куонкуруска Иван Игнатьев (“СӨ ОДьКХ ГУП Хаҥаластааҕы филиала), Александр Завражнов (Дьокуускайдааҕы ТЭЦ), Петр Габышев (Мэҥэ Хаҥаластааҕы филиал), Леонид Дьяконов (“Намкоммунтеплосбыт”) , Евгений Иванов (“Теплоэнергия”), Гаврил Заровняев (Горнай), Станислав Жезоров (“Теплоэнергия” МУП) кытталлар.

Куонкуруһу үөрүүлээхтик арыйыыга СӨ ОДьКХ уонна энергетика миниистирин бастакы солбуйааччы Виктор Романов тыл этэригэр бу куонкуруска кыайыылаах федеральнай таһымҥа – Самараҕа тиийэ кыттыаҕын туһунан эттэ. Идэтийбит үөрэхтээһини сайыннарыы институтун дириэктэрэ Лилия Иванова бу маннык куонкурустар устудьуоннар сайдалларыгар бэртээхэй былаһаакканан буолалларын бэлиэтээтэ. Маннык куонкурустар  үгүс улуустарга ыытыллыбыттар. Ол курдук, Чурапчыга бастыҥ сыбаарсыгы, Дьокуускайдааҕы бырамыысыланнас техникумугар бастыҥ уот тардааччыны уо.д.а. быһаарбыттар.

Дьокуускайдааҕы хомунаалынай-тутуу техникумун дириэктэрэ Евгений Попов өрөспүүбүлүкэ ОДьКХ ситимигэр 100-чэ бастыҥ силиэсэр баарын бэлиэтээтэ. “Дьокуускайдааҕы сварка киинэ” тэрилтэ салайааччыта Николай Терентьев уолаттарга ситиһиини баҕарда.

Күрэхтэһээччилэр куттал суох буолуутугар инструктаһы ааһан баран, ыйытыыларга хоруйдааһыны толордулар. Эбиэт кэннэ күрэхтэһи практическай чааһа буолуоҕа. Ону тэҥэ салайааччылар “СӨ ОДьКХ эйгэтигэр каадырдары бэлэмнээһин сытыы боппуруостара” диэн тиэмэҕэ “төгүрүк остуолга” кытыннылар. Кэпсэтиини бу техникум дириэктэрэ Евгений Попов иилээн-саҕалаан ыытта.

“Төгүрүк остуолу” техникум устудьуоннарын үлэҕэ ыҥырыы быһыытынан сыаналыахха сөп. Элбэх үлэ миэстэтэ баарын иһитиннэрдилэр. Холобура, “Теплоэнергия” АУо дириэктэрин персоналы салайыыга солбуйааччыта Константин Соколов иһитиннэрбитинэн, бу тэрилтэҕэ 48 миэстэҕэ үлэһит көрдүүллэр. Бу 43 хочуолунайдаах, 700-чэ үлэһитээх улахан тэрилтэ үлэһиттэрин үөрэтэр анал бырагыраамалардааҕа кэрэхсэбиллээх. Манна үтүө үгэс олохтоммута ырааппыт. Силиэсэртэн, атын да оробуочай идэлэртэн саҕалаан салайааччы буолан тахсарга  үүннэрэр бэртээхэй тэрилтэ. “СӨ ОДьКХ “ГУП производствоны хонтуруоллааһыҥҥа салайааччыта Арсен Булгаров хомунаалынайдар эдэр исписэлиистэргэ эмиэ болҕомтону ууралларын кэпсээтэ. “Теплоэнергосервис” кылаабынай инжененрин солбуйааччы Дмитрий Кондратьев, Николай Давыдов устудьуоннары үөрэнэ сылдьар кэмнэригэр куттал суох буолуутун техникатын тутуһууга үчүгэйдик бэлэмниэххэ диэн эттэ. “Жатайтеплосеть” МУП тэрилтэҕэ 15 үлэһиккэ наадыйаллар. Техникум үөрэнээччилэрин практиканы ааһалларыгар ыҥырда бу тэрилтэ кылаабынай инженерэ Евгений Кискин.

Таарыйа аҕыннахха, “Дьокуускайдааҕы хомунаалынай-тутуу техникумугар” быйылгы үөрэх дьылыгар 757 устудьуон үөрэнэр. Кинилэри 7 исписээлинэскэ, 9 идэҕэ бэлэмнииллэр. Быйыл үөрэнэн бүтэрээчилэр сорохторо М.К.Аммосов аатынан ХИФУ-ҕа салгыы үөрэнэр баҕалаахтарын этэллэр.

Дириэктэр кэпсииринэн, быйыл үөрэнээччилэри техникумҥа кэлэллэрин туһугар идэҕэ туһаайыынан киэҥ өрүттээх үлэ ыытыллыбыт. Сүрүннээн чугастааҕы улуустары хаппыттар. Бу техникумҥа хоту улуустартан кэлэн үөрэнэллэрин туһугар эмиэ десаннары тэриийэххэ баара. Ону айанын үбүлээһиҥҥэ көмөлөһөллөр буоллар, бэрт буолуо этэ.

Билигин куонкурус практическай чааһа саҕаланна. Куонкурус тыҥааһыннаах. Дьэ, ким бастыҥ силиэсэр аатын ылыаҕай?