Саха кэриэйдэрэ Цойдар тустарынан кинигэ бэчээттэммит

Бүгүн, ыам ыйын 31 күнүгэр, Дьокуускайга ыытылла турар Кэриэйдэр төрүччүлэрин үөрэтиигэ анаммыт норуоттар икки ардыларынааҕы пуорумҥа Дьокуускай олохтооҕо Готовцева-Цой Полина Ивановна кытынна.

Кини Уус Алдантан төрүттээх. Олоҕун оҕолору үөрэтиигэ анаабыт нуучча тылын учуутала идэлээх. Кини эмиэ кэриэйдэртэн төрүттээх.

Ол курдук, эһээтэ Цой Юн Хи былыр Владивостогунан Алдаҥҥа кэлбит, онтон Курбуһахха. Нэлэгэр диэн алааска оҕуруот ыһыытынан дьарыктаммыт. Кини нууччалыы Сергей диэн ааты ылыммыт. Полина Ивановна аҕата Цой Иван Сергеевич диэн. Цойдар үүннэрбит оҕуруоттарын аһынан бүтүн оройуоннааҕы потребительскай кэпэрэтииби хааччыйбыттар эбит.

Былырыын Курбуһахха өбүгэлэрин кэриэстээн мэҥэ тааһы арыйбыттар. Полина Ивановна төрдүн-ууһун туһунан кэпсиир бэртээхэй матырыйааллары муспут. Ону кыыһа ситэрэн-хоторон кинигэ таһаарбыт. Онон цойдарга олус күндү уонна улахан суолталаах кинигэ буолбут.