Саха киинэлэрэ быракаакка 200 мөлүйүөнтэн тахса кэриҥэ сууманы хомуйдулар

Арассыыйаҕа саха киинэлэрин көрдөрүүттэн  киирэр үп суумата бу сыл аҥаарыгар  191,4 мөлүйүөҥҥэ тиийдэ (омук быракаатын учуоттаан — 193,5 мөлүйүөнтэн тахса).

«Карина» (2024 с.) уонна  «Диодорова. Против течения» (2025 с. )  өрөспүүбүлүкэҕэ муҥутуур көрдөрүүнү ыланнар, туһааннааҕынан  49,8 уонна  46,5 мөлүйүөн буоллулар. Бу көрдөрүүлэр Арассыыйа уонна омук үгүс премьераларын аһараллар.

Быракааттан киирэр үп ордук өрөспүүбүлүкэ таһыгар үрдүүрэ  бэлиэтэнэр – бэс ыйын 27 күнүнээҕи туругунан, 53 мөлүйүөн  солкуобай кэриҥэ  буолла. Бу саха киинэтигэр интэриэс федеральнай уонна норуоттар икки ардыларынааҕы таһымнаммытын көрдөрөр.

Быйыл тахсыбыт “Кэҕэ” уонна “Белый пароход” курдук саха  артхауснай лиэнтэлэрэ өссө да  араас бэстибээл  наҕараадаларын уонна федеральнай киинэ кириитиктэрин үрдүк сыанабылларын ылаллар. Ол гынан баран, мэлдьи буоларын курдук, өрөспүүбүлүкэҕэ саха киинэлэрин көрдөрүү арыый аҕыйыыр, оттон күһүҥҥү быракаат өссө аҕыйах хомуурдаах. Онон 2025 сылга каассаттан киирэр хомуур барыллаан  250–300 мөлүйүөн солкуобай буолара сабаҕаланар.

СӨ Ил Дарханын уонна бырабыыталыстыбатын пресс-сулууспата