Саха киинэлэрин хаассабай хомуурдара миллиард аҥара солкуобайы аһардылар

2016-2024 сс. “Киинэ пуондата” ЕАИС-ка регистрацияламмыт 72 саха киинэтин уопсай хаассабай хомуурдара миллиард аҥара солкуобайы аһардылар.

2024 сыл саҕаланыаҕыттан саха киинэтин хаассабай хомуура 140 мөл. солк. аһарда, былырыын онно холоотоххо 2023 сыл устатыгар 100 мөл. солк. хомуллубута.

“Көрөргүт курдук, сыыппаралар барытын бэйэлэрэ кэпсииллэр. Бу Саха сирин киинэтин индустриятын сайдыытын, биһиги режиссердарбыт уонна кинилэр хамаандаларын сыралаах үлэлэрин түмүгүн көрдөрөр. Биллэн турар, манна «Экстра Синема» ситим эмиэ сыаналаммат кылаатын киллэрэ турар”, — диэн бэлиэтээтэ Ил Дархан Айсен Николаев.

Саҥа “Триумф” киинэ алтынньы 25 күнүгэр 18,5 мөл. солк-тан тахсаны киллэрбитэ иһилиннэ, эмиэ ол күн “Синема Парк” киинэ ситимнэригэр федеральнай көрдөрүүгэ тахсыбытын учуоттаатахха, алтынньы бүтүүтэ 25 мөл. солк. тиийиэҕэ.

Өрөспүүбүлүкэтээҕи киинэ ситимнэргэ алтынньы бүтүүтэ прокат хомуурун суумата 300 мөл. солк. аһарыа, (2023 сылга – 255 мөл. солк. этэ), диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.