Саха охчута Мария Тараярова Европа Куубагын үрүҥ көмүс призера буолла

Саха кыыһа Мария Тараярова Словения Чатеж куоратыгар буолбут 21 саастарыгар диэри юниордар икки ардыларынааҕы Европа Куубагар «классическай ох» көрүҥэр үрүҥ көмүс мэтээли ылары ситистэ.

«Триумф» пресс-сулууспата иһитиннэрэринэн, тыҥааһыннаах киирсиигэ Мария эрэллээх уонна бэргэн ытыыны көрдөрбүт, ол гынан баран утарылаһааччытыгар — Дзвениcлава Черныкка (Украина) хотторбут. Түмүк ахсаан — 3:7.

«Европа Куубагын үрүҥ көмүһэ — сыралаах үлэ уонна успуорка чаҕылхай түмүгэ. Мария турнир бары кэрдиистэрин — сүүмэрдэһинтэн финалыгар диэри бигэ туругун уонна үрдүк болҕомтотун тутан ааста. Тараярова дойду биир бастыҥ эдэр охчута уонна Саха сирин киэн туттуута. Кини ситиһиитэ — дойдубут оҕунан ытыытын оскуолатын сайдыытыгар сүҥкэн кылаат», — диэн иһитиннэриигэ этиллэр.