Саха сирэ ДНР өссө 11 эбийиэгин чөлүгэр түһэриэҕэ

Бу сыл устата 11 эбийиэги чөлүгэр түһэрэр үлэ былааннанар. Ол иһигэр, Докучаевскайга ИТ-кииннээх Ыччат киинин. Кииҥҥэ Саха сиригэр ситиһиилээх бастыҥ быраактыкалары олоххо киллэрии былааннанар. Ол туһунан РФ Бырабыыталыстыбатын бэрэссэдээтэлин солбуйааччы – Уһук Илиҥҥэ РФ бэрэсидьиэнин боломуочуйалаах бэрэстэбиитэлэ Юрий Трутнев мунньаҕар иһитиннэрдилэр.

Саха Өрөспүүбүлүкэтэ бииргэ үлэлэһэр  Кировскай куоратыгар  50-тан эбийиэги чөлүгэр түһэрдэ. 2024 сыл түмүгүнэн Саха сирэ 65 эбийиэккэ былааннаммыт өрөмүөн үлэлэрин толору оҥордо. Суолу, 53 олорор  дьиэни чөлүгэр түһэрдилэр.

2025 сылга успуорт комплексыгар, бассейҥҥа, куорат пааркатыгар уонна Галанскай уулуссаҕа уу барар сирин өрөмүөннээһин салҕанар.

Донецкай Норуодунай Өрөспүүбүлүкэҕэ  чөлүгэр түһэрэр үлэлэргэ Уһук Илин 11 эрэгийиэнэ кыттар. 2025 сылга 165 эбийиэккэ үлэ ыытыллыаҕа.

«Биһиги уопсай сорукпут – тэрилтэлэри үлэлэтии, Донецкай өрөспүүбүлүкэҕэ үлэһит эрэгийиэн албан аатын төнүннэрии”, — диэтэ Юрий Трутнев.