«Саха сирэ» хаһыат бүгүн тугу суруйда?

«Саха сирэ» хаһыат бүгүн тугу суруйда?

СӨ Тыатын хаһаайыстыбатын уонна ас-үөл бэлиитикэтин министиэристибэтэ “СӨ муниципальнай оройуоннарын уонна куораттааҕы уокуруктарын олохтоох салайыныыга уорганнарыгар судаарыстыба тыа хаһаайыстыбатын үлэтин өйүүр сорох боломуочуйаларын биэрэр туһунан” сокуоҥҥа уларытыы киллэрбитин Ил Түмэн дьокутааттара ылыммыттара. Онон өйөбүл мэхэньиисимэ уларыйбыта. Тыа сиригэр быйылгыттан бэриллибит тыа хаһаайыстыбатын боломуочуйатын туһунан бүгүҥҥү бээтинсэтээҕи хаһыакка суруналыыс Женни Стрюкова сырдатта.

Бу күннэргэ Өлүөнэ Эбэҕэ үлэ саамай суолталаах уонна көдьүүстээх көрүҥэ – мууһу эрбээһин уонна хараардыы ыытылла турар. Сааскы олус түбүктээх үлэ хайдах барарын билсээри суруналыыстар бөлөхтөрө Өлүөнэ Эбэ үрдүгэр турар Кангалас бөһүөлэгин туһаайыытынан айаннаатыбыт. “Дом рыбака” туристическай бааза диэки тиийдибит. Бу Дьокуускай аннынан муус харыыта бэлиэтэнэр сирэ эбит. Хойуу хаар уонна күүстээх тыал түһэн суолбутун тибэн иһэр. Онон айаммыт бытаан. Син өр айаннаан, тиийиэхтээх сирбитигэр кэллибит. Бэйэ-бэйэлэриттэн тэйиччи хас да ыарахан уйуктаах тиэхиньикэ үлэлии сылдьарын көрөбүт. Сиһилии мууһу хараардыы үлэтэ хайдах барарын бүгүҥҥү хаһыакка ааҕыҥ.

Бу ый саҥата «Аэрофлот»  АХ ыам ыйыттан  “плоские тарифы” диэн  бырагырааматын Уһук Илин куораттарыгар  кэҥэтиэхтээҕин туһунан дойду Аҕа баһылыгар Владимир Путиҥҥа дакылааттаабыта. Ол бырагыраамаҕа Дьокуускай эмиэ хабыллыбыта. Онон, “Авиасейлс” сервискэ билигин киирэн билиэт сыанатын көрдөххө, Дьокуускайтан Москваҕа диэри биллэ чэпчэки сыанаҕа көтүөххэ сөп эбит диэн эрэх-турах санаа үөскээтэ. Бу туһунан “Арыый да удамыр сыанаҕа  киин куораттарга көтүөхпүт” диэн матырыйаалга сиһилиин ааҕыҥ.

Степанида Ильинична Борисова Олоҥхо тыйаатырын төрүттэһиэхтээҕэ, онно аан бастакы артыыс, режиссер буолуохтааҕа, олоҥхону ускуустуба таһымыгар киэҥ эйгэҕэ таһаарыыга көмүс көлөһүнүн тоҕуохтааҕа дьылҕатыгар төрүөн инниттэн суруллубут курдук. Тоҕо диэтэххэ,  кини – олоҥхоһут кыыһа. Муус устар 15 күнүгэр тапталлаах артыыспыт үбүлүөйдээх 75 сааһын туолла. Бүгүн “Итии чэй” рубрикаҕа “Ыстапааһа, Стеша, Степанида…” диэн суруналыыс Майя Власьева интервьютун ааҕыҥ.

Социальнай ситим киэҥник сайдыаҕыттан өрөспүүбүлүкэҕэ “хотон үлэһитигэр наадыйабыт” диэн ботуччу соҕус хамнаһы ыйан биллэриилэр тарҕаналлар. Киһи өйүгэр баппат уустук быһыы-майгы соторутааҕыта Ньурба улууһун Күндээдэ нэһилиэгэр тахсыбыта. Тыа хаһаайыстыбатынан дьарыктанар пиэрмэр икки киһини хаайан олорон хотонун көрдөрбүт. Киһи олорор кыаҕа суох усулуобуйатыгар пиэрмэр хотон көрөөччүтүн ыт курдук сыаптаан хаайан олордубут. Сотору-сотору кырбыыр эбит. Бу эр дьон кулуттааһыҥҥа түбэспиттэрин туһунан ким да билиэ суоҕа эбит, ону эдэрчитэ түгэнинэн туһанан куотан, дьонтон көмө көрдөөн, ынырык сурах бүтүн өрөспүүбүлүкэни тилийэ көппүтэ. Кини дэриэбинэ үрдүнэн биир уоттаах ыалга кэлэн тоҥсуйан өрүһүлтэ көрдөөн быыһаммыт. Дьиэлээх хаһаайка сонно тута быраабы араҥаччылыыр уорганнарга биллэрбит. Сиһилии бу сытыы тиэмэни суруналыыс Ульяна Захарова ырытыытыгар ааҕыҥ.

“Саха сиригэр уон сылга биирдэ ыытыллар физкултуураҕа Бүтүн Арассыыйатааҕы олимпиада түмүктүүр түһүмэҕин көрөөрү “Өрөгөй” спортсменнары бэлэмниир кииҥҥэ тиийэбин. Сэргэх, сонун түгэн элбэх. Холобур, Нерюнгриттан олимпиадаҕа кыттар үөрэнээччилэрин математика учуутала эрчийэр, Мурманскай уобаластан кытта кэлбит оҕону учуутал эбээтэ арыаллыыр…” Суруналыыс Людмила Попова ханна тиийэн маннык суруйбутун бүгүҥҥү хаһыаттан билиэххит.

Көрөөччүгэ улахан арыйыынан буолбут, киинэҕэ уһулларга сайаапка биэрбит 80 тан тахса кыыстан талыллыбыт Мария Иванова Анастасияны оонньоото. Киинэни устааччылар уонна Анастасия, Людмила Диодоровалар санааларынан, эдэр кыыс улахан артыыстартан чаҕыйбакка оонньообутун улаханнык астыннылар. Мария Иванова устар хамаанда уонна артыыстар көмөлөрүнэн оруолун аһара ыарырҕаппатаҕын, Анастасия киниэхэ улахан холобур буолбутун туһунан билиннэ” диэн ырытта суруналыыс Надежда Егорова бу күннэргэ буола турар Анастасия Диодорова туһунан киинэни. Ааҕыҥ уонна сэргээҥ.

Муус устар 1 күнүттэн бэс ыйын 30 күнүгэр диэри электроннай сэрэбиэйгэ сайаапканы хомуйан саҕалаатылар. Бу туһунан СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин Булт уонна булт баайын харыстааһыҥҥа департаменын салайааччыта Владимир Решетников бүгүҥҥү хаһыакка сиһилии быһаарда.

Төрүт ас сиргэ чугаһатар буоллаҕа. Онон даачаҕа оҥоруохха сөп. Сөрүүн сиргэ туруохтаах, кыраадыһын тутуһуллуохтаах. Мин бэйэм даачам суох буолан, дьүөгэм даачатын аттыгар, быраҕыллыбыт учаастакка куурусса уйата баарын булан, өрөмүөннээн, ис өттүттэн таҥаһынан бүрүйэн, тар хоспоҕун оҥорбуппут. Онон баҕалаах киһи быыс-хайаҕас булар, сатаан оҥорор” диэн суруналыыс Ангелина Васильева “Тар туһата” матырыйаалыгар бэртээхэй сүбэни биэрэр исписэлиистин кэпсэттэ. Бу туһунан бүгүҥҥү бээтинсэтээҕи хаһыакка ааҕыҥ.

.