«Саха сирэ» хаһыат Нам улууһугар сурутуу аахсыйатын тэрийдэ

«Саха сирэ» хаһыат редакциятын кытта сурутуу аахсыйатынан бүгүн Дархан этээччилэр Валентин Хорунов уонна Марта Николаева Нам улууһугар тахса сырыттыбыт.

Худуоһунньук Е.Шапошников аатынан орто оскуолаҕа ахсыс кылаас үөрэнээччилэрин кытары көрүстүбүт. Оскуола дириэктэрэ А.М. Дьяконов 2022 сылтан икки этээстээх таас оскуолаҕа киирэн үөрүүлэрэ муҥура суоҕун кэпсээтилэр. 220 үөрэнээччи биир сменанан үөрэнэр. Оскуола 50 миэстэлээх интэринээттээх эбит. Оҕолор көрсүһүүгэ интэриэһиргиир ыйытыыларын биэрдилэр, күнү тула оһуокайдаатыбыт.

Салгыы Намҥа киирэн Бэдьээлэ аатынан Олоҥхо киинигэр сырыттыбыт. Дириэктэр В.В.Колпашникова дьиэ иһин-таһын көрдөрдө. Олоҥхо дьиэтин тэлгэһэтэ урукку үйэҕэ намнар ыһыахтыыр ытык сирдэрэ эбит. Манна саамай историческай түгэни биллибит. Биллиилээх судаарыстыбаннай диэйэтэл, суруйааччы П.А.Ойуунускай 1937 сыллаахха ыһыахха тахсан эппит киин трибуната саҥардыллан турар эбит. Аны Олоҥхо дьиэтин тэлгэһэтигэр эбии миэстэтин кэҥэттэрэн докумуоннаһан, Вера Васильевна Оһуокай искибиэрин туттараары сирин дэхсилэтэн, кумах тастаран, дьэ үлэҕэ бөҕөтө былааннанан турар эбит.

Бүгүн Нам улууһун күнэ буолан, эдэр этээччилэрбит, элбэх кэллэктиип куоракка киирбиттэр. Ол да буоллар, көрсүһүүгэ кэлэн «Саха сирэ» хаһыакка суруттардылар. «Дерево добра» аахсыйанан дириэктэр үс аҕам саастаах дьоҥҥо хаһыакка суруттарда. Орто Халымаҕа убайыгар 70 сааһын туолбутунан, Арҕахтаах нэһилиэгин олохтооҕор Н.В.Слепцовка суруттарда. Биһиги оһуокайдьыттарбыт, ол иһигэр СӨ үтүөлээх этээччитэ С.П.Алексеев эмиэ алта ыйга суруттарда. Сорохторбут эрдэ суруттарбыттарын эттилэр. Көрсүһүүбүт оһуокайынан түмүктэннэ.

Марта Николаева.