Саха сирэ «Промсвязьбанк» ПАУо кытары сөбүлэһии түһэристэ

Петербурдааҕы норуоттар икки ардыларынааҕы экэнэмиичэскэй пуорум иитинэн, бэс ыйын 15 күнүгэр, Саха Өрөспүүбүлүкэтэ уонна  «Промсвязьбанк» ПАУо бииргэ үлэлээһиҥҥэ икки өрүттээх сөбүлэһии түһэристилэр.  Сөбүлэһиигэ «Промсвязьбанк» бэрэссэдээтэлэ  Петр Фрадков уонна Ил Дархан  Айсен Николаев илии баттаатылар.

Өрөспүүбүлүкэ социальнай суолталаах бырайыактарыгар уонна урбааны сайыннарыы бырагырааматыгар баантан өйөбүл ылыаҕа.   Бииргэ үлэлээһин  урбаан салаатыгар кирэдьииттээһин, Саха сирин олохтоохторугар ипотеканы биэриигэ, олорор дьиэнэн хааччыйыыга, тутууга федеральнай бырагыраамалары олоххо киллэриини кытары сибээстээх.

«Бүгүн түһэриллибит сөбүлэһии федеральнай уонна эрэгийиэннээҕи бырагыраамалары олоххо киллэриигэ төһүү күүһүнэн буолуоҕа. Биисинэскэ уонна олохтоохторго үбүнэн көмөнү оҥорууга өйөбүл буолуоҕа», –  диэтэ  Айсен Николаев.