«Саха сирэ» резиденнэрэ туризм уонна авиация салаатыгар 8 бырайыагы олоххо киллэрэллэр

Саха сирэ Уһук Илин уокуругар үгүс хайысхаҕа инники күөҥҥэ сылдьар эрэгийиэн быһыытынан урбаан эйгэтин кэскиллээх бырайыактарын олоххо киллэриигэ эмиэ – бастакы кэккэҕэ.

Онуоха “Уһук Илин сайдыытын корпорацията” АУо («Корпорация развития Дальнего Востока и Арктики») “Саха сирэ” урутаан сайдар сирэ-уота (ТОР) оруола сүҥкэн. Бүгүҥҥү күҥҥэ манна 51 резидент араас ха­­йысхалаах быра­йыагы олоххо киллэрэр соруктаах үлэлиир.

“Саха сирэ” урутаан сайдар сир-уот (ТОР) салайааччытын резиденнэри кытта үлэҕэ солбуйааччы Николай Потапов бэлиэтииринэн, бүгүҥҥү күҥҥэ резиденнэр туризм уонна авиация салаатыгар 8 бырайыагы олоххо киллэрэллэр.

– Туризм эйгэтигэр бастакы инвесторынан «Глэмпинг «Круглое» ХЭУо буолбута. Маны таһынан, Тулагыга – аччыгый авиация аэродрома («Ил Аэро» ХЭУо), («Хелипорт Якутск» бөртөлүөт киинэ («Восток Эйр» ХЭУо), «Долина Күөрээйи» («АлгысТур» ХЭУо), Саталга – «Ил Эйгэ» («Афалин» ХЭУо), “Дьаамсыктар ыстаансыйалара” турбааза («Сахатур» ХЭУо), – Эргэ Табаҕа аттыгар Оҕо сынньанар, доруобуйатын бөҕөргөтөр лааҕыра (“Полярная звезда” ХЭУо) тутулла тураллар. Киин куоракка 4 сулустаах  150 нүөмэрдээх национальнай истиили тутуһан COSMOS гостиница тутуллара былааннанар, – диэн билиһиннэрдэ Николай Потапов.

Бүгүн биһиги “Уһук Илин сайдыытын корпорацията” АУо “Саха сирэ” урутаан сайдар сирин-уотун (ТОР) өйөбүлүнэн олоххо киирэн эрэр, Саха сирин дорҕоонноохтук ааттатыахтаах икки бырайыагы билиһиннэриэхпит.

Лааҕыры тутуу

Кэлиҥҥи сылларга дойдуга оҕо лааҕырдарын усулуобуйаларын анаалыстаан, ырытан баран, үрдүкү былаас уорганнарыгар урукку эргэрбит сэбиэскэй кэминээҕи эбийиэк­тэри өрөмүөннүүр, саҥардар оннугар саҥа, аныгы ирдэбилгэ эппиэттиир усулуобуйа­лаах комплекстары тутан таһаарыыга ылсар сорук турбута.

350 миэстэлээх сылы эргиччи үлэлиир оҕо доруобуйатын бөҕөргөтөр “Полярная звезда” лааҕыр бырайыагын өрөспүүбүлүкэ бырабыыталыс­тыбатыгар 2018 сыллаахха билиһиннэрбиттэрэ. 2019 сыл ахсынньытыгар экэниэмикэ миниистирэ Майя Данилова уонна «Полярная звезда» хампаанньа генеральнай дириэктэрэ Иван Игнатенко тутууну саҕалыыр ирдэбилгэ сөбүлэҥ түһэрсибиттэрэ. 2020 сыл саҥатыгар РФ бырабыыталыстыбатын бэрэссэдээтэлэ Михаил Мишустин “Саха сирэ” урутаан сайдар сири-уоту (ТОР) кэҥэтэр туһунан ыйаах таһаарбыта. Атырдьах ыйын 3 күнүгэр “Уһук Илин сайдыытын корпорацията” АУо («Корпорация развития Дальнего Востока») уонна бырайыак инвестора “Полярная звезда” ХЭУо инвес­тициянан үлэлииргэ сөбүлэҥ баттаспыттара. Ити курдук, Эргэ Табаҕа (Старая Табага) нэһилиэгин чугаһыгар 12 300 кв. м иэннээх Оҕо сынньанар, доруобуйатын бөҕөргөтөр лааҕыра Өлүөнэ Эбэ саамай кэрэ көстүүлээх биэрэгэр, кырасыабай айылҕалаах сиргэ туттуллара быһаарыллыбыта.

“Полярная звезда” (“Хотугу сулус”) ХЭУо сакааһынан тутуллар өрөспүүбүлүкэтээҕи оҕо сынньанар киинэ Арассыыйаҕа аныгы технология ирдэбилинэн тутуллар бастакы лааҕыр­дар “пилотнай” быра­йыактара.

Сөҕүмэр тутуу

Бу күннэргэ лааҕыр  тутуутун билсэ “Сахамедиа” холдинг фотограба Мария Васильеваны кытта Эргэ Табаҕа туһаайыытын тутустубут.  “Уһук Илин сайдыытын корпорацията” АУо («Корпорация развития Дальнего Востока») ди­­риэктэрин солбуйааччы Федор Барашков биһигини тутулла турар “Полярная звезда” Оҕо сынньанар киинин тутуутугар күһүҥҥү айылҕа саамай тупсан турар  сиригэр аҕалла. Массыынаттан түһээт, тутулла турар эби­йиэги көрө-истэ бардыбыт. Биһигини “Полярная звезда” ХЭУо генеральнай дириэктэрэ Григорий Иванов көрүстэ. Дьэ, киһи сөҕө-махтайа көрө сүүнэ тутуута эбит, доҕоор! Үлэ күөстүү оргуйа турар. Григорий Юрьевич тутулла турар эбийиэ­ги ыйа-ыйа тутуу хаамыытын билиһиннэрэн барда:

– “Полярная звезда” ХЭУо генеральнай дириэктэринэн быйыл кулун тутартан ананан үлэлиибин. Бу иннинэ Экэниэмикэ министиэристибэтин дэпэртээмэнин салайбытым. Судаарыстыбаннай-чааһынай тутууну салайбыт буолан, бу тутуу туһунан барытын эрдэттэн билэр эбийиэгим. Ол эрээри сулууспалаах эрэ быһыытынан билэр этим буол­лаҕа, билигин  сыл аҥаарыттан ордук үлэлээн, балаһыанньаны төрдүттэн билэр киһиэхэ уустук боппуруос суох диэххэ сөп. Бүгүҥҥү күҥҥэ тутуу генеральнай бэдэрээтчитэ  “Альянс-2005” ХЭУо  үлэтин 50%-нын бүтэрдэ.

15 симиэнэҕэ – 350 оҕо

Кэпсэтэ иһэн, Григорий Ивановтуун тутулла турар куор­пустарга чугаһыыбыт. Улахан бэйэлээх дьиэлэр бэ­­йэ-бэйэлэрин кытта силбэһэ туралларын көрөн, хас дьиэ тутулла турарын туоһуластым.

– Бэлиэтээбитим курдук, Саха сирэ дойдуга бу маннык аныгы ирдэбилгэ эппиэттиир тутуулаах оҕо лааҕырын олоххо киллэриигэ бастакы эрэги­йиэнинэн буолар. Бу бырайыагы “Оҕо сынньалаҥын национальнай оператора” ГК ( НОДО – Национальный оператор детского отдыха) көҕүлүүр. Тэрилтэ генеральнай дириэктэрэ Евгений Шулятьев бэлиэ­тииринэн, Саха сирин кэнниттэн маннык бырайыагы Хабаровскай кыраайга, Сахалинскай уобаласка уонна Башкирия Өрөспүүбүлүкэтигэр олоххо киллэриэхтэрэ. Барыта 8 куорпуһу тутан дьэндэтэн эрэбит. Ол эбэтэр, 4 уту­йар-сынньанар, 2 спортивнай, 2 административнай дьиэ. Уопсайа сылга 15 си­­миэнэҕэ 350-нуу оҕо сынньанан доруо­буйатын бөҕөргөтүөҕэ, эбии үөрэхтээһиҥҥэ сылдьан билии­тин кэҥэтиэҕэ, бэйэтин кыаҕын сайыннарыаҕа. Бу куорпустарга онлайн-оскуола, аактабай уонна киинэ саалалара, видео-устуудьуйа, профориентация киинэ, быыстапкалыыр зона уонна да атын эбийиэктэр баар буолуохтара, – диэн кэпсиир Григорий Юрьевич.

Үлэ кыраапыга кэһиллибэт

Үлэһит илии тиийбэтэ – уустук боппуруос. Салайааччы бэлиэтииринэн, 150 киһи үлэлиэхтээҕиттэн бүгүҥҥү күҥҥэ тутууга 80 киһи үлэлиир эбит.

– Бу Саха сирин үрдүнэн көстөр кыһалҕа. Тутууга үлэһит илии тиийбэт. Ол да буоллар, уопуттаах генеральнай бэдэрээтчит “Альянс 2005” ХЭУо ылыммыт былаанын кыраапыгын кэспэккэ, кэмигэр толорон иһэр. Тутуу матырыйаала тиийэр, онон ылыммыт сорукпутун толоруохпут, – диир Григорий Иванов.

Оттон сорук олус эппиэтинэстээх – эһиил ыытыллыахтаах “Азия оҕолоро” спортивнай оонньуулар ыалдьыттара бу куорпустарга түһүөхтээхтэр. Дьэ, онон, кырдьык да олус суол­талаах тутуу бара турар.

Дьаамсыктар үлэлэрин үйэтитэр аныгы эбийиэк

“Полярная звезда” Оҕо сынньанар лааҕырын аттыгар суол нөҥүө иккис улахан тутуу бырайыактанар.

Бу – Эргэ Табаҕа сиригэр-уотугар тутулла турар туристичес­кай эбийиэктэртэн биирдэстэрэ. Улахан тутуунан буолуохтаах ”Дьаамсык ыстаансыйата” үгүс туриһы мунньуоҕа. “Саха сирэ” урутаан сайдар сир-уот (ТОР) резиденэ «СахаТур» хампаанньа тутар туристическай комплексыгар 8 глэмпинг-эбийиэк, баанньык, эрэстэрээн тутуллара былааннанар. Инвестиционнай бырайыак Уһук Илин уонна Арктика сайдыытын корпорациятын (КРДВ) кытта сөбүлэҥин чэрчитинэн олоххо киирэр.

Биһиги сылдьар кэммитигэр бэдэрээтчиттэр икки дьиэни тутан бүтэрбиттэр. «СахаТур» хампаанньа бэрэстэбиитэлэ Светлана Попова иһитиннэрбитинэн, “Дьаамсыктар ыс­­таансыйалара” туристическай комплекс сылы эргиччи үлэ­­лиэҕэ.

– Дьаамсыктар култууралара Саха сирин биир чаҕылхай устуоруйатынан буолар. Биһиги бу бырайыакка ылсаары аатыр­быт Иркутскай-Саха сирин туһаайыытынан дьаамсыктар сырыыларын олохтоохтук үөрэппиппит. Ыраахтааҕы саҕана таһаҕаһы уонна буостаны тиэйиигэ дьаамсыктар оруол­лара улахан этэ. Дойдубут биир умнуллубат устуору­йатын үйэтитэр инниттэн бу бырайыагы олоххо киллэрээри былыргы тэриллэри, сундууктары, иһити-хомуоһу хомуйдубут. Онон түмэл кэриэ­тэ буолар туристическай комплекс туристар болҕомтолорун тардыаҕа, – диэн Светлана Попова кэпсээтэ.

Ити курдук, Уһук Илин сайдыытын корпорацията” АУо («Корпорация развития Дальнего Востока») “Саха сирэ” уру­таан сайдар сирин-уотун (ТОР) үлэтин-хамнаһын кылгастык “сэгэтэн” ыллыбыт. Салгыы корпорация далааһыннаах үлэтин олохтоохтук сырдатан иһиэхпит.