Саха сирэ уонна ДНӨ «Өйдөбүнньүк бастионнара» бырайыак мемориала туруохтаах куоратын быһаарыахтара

Саха сирин уонна Донецкай Норуодунай Өрөспүүбүлүкэтин салалталара ДНӨ-гэр «Өйдөбүнньүк бастионнара» бырайыак чэрчитинэн мемориал туруоруллуохтаах куоратын быһаарыахтара.

Бу туһунан ТАСС-ка Дьокуускайга ыытыллар Хотугу пуорум кэмигэр РФ Бэрэсидьиэнин иһинэн Саха сирин бастайааннай бэрэстэбиитэлэ – СӨ Бырабыыталыстыбатын бэрэссэдээтэлин бастакы солбуйааччы Андрей Федотов иһитиннэрдэ.

«Мин санаабар, 2026 сыл саҕаланыытыгар ханнык эмит этиилэр оҥоһуллан тахсыахтара», — диэн Федотов ТАСС ыйытыытыгар хоруйдаата. Кини этэринэн, билиҥҥи туругунан Саха сирин уонна ДНӨ салалталара мемориал ханнык куоракка туруохтааҕын быһаарсаллар.

«Ханнык пааматынньык буоларын эмиэ толкуйдуубут. Тоҕо диэтэххэ, «Өйдөбүнньүк бастионнара» диэн билигин – Аҕа дойду Улуу сэриитигэр охтубут буойуттарбыт кэриэстэригэр анаммыт обелискалар. Ол гынан баран, билигин байыаннай дьайыыга сыһыаннаах устуоруйалар баар буоллулар, онон билигин ити тиэмэҕэ сүбэлэһэбит», — диэн кини бэлиэтээтэ.

«Өйдөбүнньүк бастионнара» диэн устуоруйа-патриотическай бырайыагы Саха сирэ Улуу Кыайыы 80 сылын көрсө үлэлэппитэ.