Саха сиригэр 36 тыһ. тахса бүддьүөт үлэһитин хамнаһа үрдүөҕэ

Ил Дархан Айсен Николаев Судаарыстыбаннай Мунньахха (Ил Түмэн) Анал этиитин олоххо киллэрэр соруктаах, СӨ Бырабыыталыстыбата дойду бэрэсидьиэнэ Владимир Путин 2012 сыллааҕы “ыам ыйынааҕы” ыйааҕыгар хапсыбатах бүддьүөт үлэһиттэрин хамнастарын 6,3 % үрдэтэр туһунан быһаарыы ылыммыта.

Бүддьүөт эйгэтин квалификациялаах 36 тыһ. тахса үлэһитин хамнаһа үрдүөҕэ.

Бүддьүөт эйгэтин “ыам ыйынааҕы” ыйааҕар хапсыбатах үлэһиттэр хамнастарын үрдэтэргэ  быйылгы сылга өрөспүүбүлүкэҕэ 1,85 млрд. солк. үп көрүллүбүтэ.

Бүддьүөт үлэһиттэрин хамнастарын уопсай индексациялааһынын таһынан, муус устар 1 күнүттэн кыра хамнастаах бүддьүөт эйгэтин квалификациялаах үлэһиттэрин хамнастарын ааҕыытын сөпкө араартааһыны (объективная дифференциация) түһүмэхтэринэн  киллэрии үлэтэ барыаҕа. Бу сыалга анаан эбии 1,3 млрд. солк. тыырыллыбыт.

Күн бүгүн толорор былаас уорганнара хамнас төлөбүрүн систиэмэтин салааларыгар сөптөөх уларытыылары киллэрэр бырайыактары бэлэмнииллэр.

Ил Дархан уонна Бырабыыталыстыба пресс-суслууспата.