Саха сиригэр 435 тыһыынча туонна от бэлэмнэнэрэ былааннанар

Сир оҥоһуутун уонна тыа хаһаайыстыбатын салааларын сайыннарыы департаменын салайааччытын солбуйааччы Дьулустаан Харлампьев этэринэн, 2024 сылга Саха сиригэр 435 тыһыынча туонна от, 28 тыһыынча туонна сиилэс уонна 14 тыһыынча туонна сенаж бэлэмнэнэрэ былааннанар.

Бу туһунан кини сүөһү аһылыгын бэлэмниир хампаанньа уонна үүнээйи үүннэриитин салаатын сайыннарыы соруктарын туһунан социальнай ситимнэринэн быһа эпиир кэмигэр кэпсээтэ.

«2024 сылга ылыныллыбыт былаанынан Саха сиргэр 435 тыһыынча туонна от, 28 тыһыынча туонна сиилэс уонна 14 тыһыынча туонна сенаж бэлэмнэнэр. Сүөһү аһылыгын бэлэмнээһин муниципальнай бырагыраамаларын хос үбүлээһинин чэрчитинэн Саха сирин бүддьүөтүттэн 175 мөл. солк. уонна олохтоох бүддьүөттэн 204 мөл. солк. көрүлүннэ», — диэн Дьулустаан Харлампьев иһитиннэрдэ. Ону сэргэ быйыл 203 сүөһү аһылыгын бэлэмниир тиэхиньикэ уонна оборудование аҕалыллара, 198 км усталаах күрүө тутуллара,  400 туонна оту батарар 30 оту харайар хранилище тутары былаанныыллар. Департамент салайааччыта быйыл атын эрэгийиэннэртэн сүөһү аһылыгын тиэйии былааннамматын туһунан бэлиэтээтэ.