Саха сиригэр 44 тыһыынча туонна үүтү соҕотуопкалаатылар

Бүгүҥҥү туругунан Саха сиригэр 44 769,88 туонна үүт соҕотуопкаланна (былаантан 81,5 быр.). Бу туһунан Тыа хаһайыстыбатын уонна аска-үөлгэ бэлиитикэтин министиэристибэтэ иһитиннэрдэ.

Нам улууһа былаанын 96,3 % толорон, инники күөҥҥэ таҕыста. Бу улуус 2 110,16 туоннаны соҕотуопкалаата. Кинилэр кэннилэриттэн Сунтаар улууһа  (5 465,63 туонна, 95,2%), Мэҥэ Хаҥалас оройуона (4 229,89 туонна, 93,1%), ону тэҥэ Дьокуускай куорат (2 432,67 туонна, 92,6%).

Дьокуускай куоракка уонна 20 оройуоҥҥа үүтү 44 соҕотуопкалыыр тэрилтэ тутар. Быйылгы былаан – 54 924 туоннаттан тахса үүт.

Өрөспүүбүлүкэҕэ үүтү соҕотуопкалааһыҥҥа 3,5 млрд солкуобайдаах субвенция көрүллүбүтэ. Тыа хаһаайыстыбатын министиэристибэтэ иһитиннэрэринэн, үүтү туттарааччыларга субсидия харчыта толору кээмэйинэн тиэрдиллибит.

Санатан эттэххэ, Саха сирин Ил Дарханын Айсен Николаев сорудаҕынан бу сыл тохсунньу 1 күнүттэн үүт субсидията 1 киилэтигэр 60-тан 65 солкуобайга диэри үрдэтиллибитэ. Субсидияны улаатыннарыы кэнниттэн тутар сыана үүккэ 80 солкуобайга тэҥнэспитэ, итинтэн 15 солкуобайын пиэрмэрдэргэ соҕотуопкалыыр тэрилтэ төлүүр.

СӨ Ил Дарханын уонна Бырабыыталыстыбатын пресс-сулуупата