Саха сиригэр 90 тыһ. туонна кэриҥэ от бэлэмнэннэ

Быйылгы сүөһү аһылыгын бэлэмниир хампаанньа тигинэччи баран иһэр. От ыйын 31 күнүнээҕи туругунан өрөспүүбүлүкэҕэ 105 тыһ. га охсулунна, 90 тыһ. туонна кэриҥэ от кэбиһилиннэ, ол эбэтэр уопсай былаантан 20 бырыһыана. Бу туһунан брифиҥҥэ тыа хаһаайыстыбатын уонна аска-үөлгэ бэлиитикэтин миниистирэ Артем Александров иһитиннэрдэ.  

Бүгүн оттуур сирдэргэ 8 тыһ. тыраахтар, 19 тыһ. киһи, 4,5 тыһ. механизированнай уонна сороҕо механизированнай звенолар үлэлии сылдьаллар.

“Кураанынан сибээстээн, Амма, Мэҥэ-Хаҥалас, Өлүөхүмэ, Таатта улуустарыгар судургута суох балаһыанньа буолан эрэр. Маны тэҥэ, сэттэ улууска мобильнай этэрээттэр тэрилиннилэр. Күн бүгүн 74 биригээдэ ходуһаҕа сылдьар. Мобильнай биригээдэлэр 35 тыһ. туонна сүөһү аһылыгын бэлэмниэхпит диэн былааннаабыттарыттан, бүгүн 650 туонната баар. Ити туруоруллубут соруктан 2 бырыһыаны ылар”, — диэн бэлиэтээтэ миниистир.

Артем Александров этэринэн, ааспыт сыллааҕы кур отун эбинэн, эрэгийиэн былаанын 97 бырыһыан толоруохтаах. Эрэгийиэҥҥэ бигэргэтиллибит былаан быһыытынан 435 тыһ. туонна от, 14 тыһ. туонна сенаж, 29 тыһ. туонна сиилэс бэлэмнэниэхтээх.

Санатан эттэххэ, от ыйын 11 күнүгэр Ил Дархан Айсен Николаев Таатта улууһугар ыыппыт сүбэ мунньаҕар Тыа хаһаайыстыбатын министиэристибэтигэр уонна муниципальнай оройуоннарга мобильнай биригээдэлэри тэрийэллэригэр уонна ыраах сирдэри оттуулларыгар соруйбута, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.