Саха сиригэр бастакы быыбардыыр учаастактар үлэлэрин саҕалаатылар

Бүгүн, кулун тутар 15 күнүгэр, Саха сиригэр Арассыыйа баһылыгын быыбарыгар куоластааһын саҕаланна. Саха сиригэр Арассыыйа Бэрэсидьиэнин быыбарыгар нэһилиэнньэ кыттыыта үрдүк көрдөрүүлээх буолара сабаҕаланар. 

811 быыбардыыр учаастак аһыллыаҕа, онтон 790-а бастайааннай, 21-э быстах кэмнээх. Манна барытыгар 6 563 учаастактааҕы быыбардыыр хамыыһыйа чилиэнэ үлэлиэҕэ.

Саха сирин хотугулуу-илиҥҥи алта оройуонугар — Абыйга, Аллайыахаҕа, Муомаҕа, Үөһээ Халымаҕа, Аллараа Халымаҕа, Орто Халымаҕа быыбардыыр учаастактар үлэлэрин саҕалаатылар. Бу улуустарга олохтоох бириэмэ 08:00 чаас буолла. Манна 16600 быыбардааччы баар.

Аны биир чааһынан Дьааҥыга, Өймөкөөҥҥө, Усуйаанаҕа олохтоох бириэмэ 08:00 чаас буоллаҕына, быыбардыыр учаастактар эмиэ аһыллыахтара.