Ил Дархан Айсен Николаев РФ Бэрэсидьиэнин быыбарыгар куоластаата

Бүгүн, кулун тутар 15 күнүгэр, Ил Дархан Айсен Николаев Дьокуускайга 33-с нүөмэрдээх оскуола дьиэтигэр баар 779-с нүөмэрдээх быыбардыыр учаастакка Арассыыйа Бэрэсидьиэнин быыбарыгар куоластаата.

«Арассыыйа Бэрэсидьиэнин быыбара – улахан суолталаах бэлитииичэскэй тэрээһин буолар. Биһиги дойду Бэрэсидьиэнин быыбарыгар хайаан даҕаны кыттыахпытын наада.
Бу быыбартан биһиги дойдубут кэлэр сылларга хайдах сайдара улахан тутулуктаах, онно биһиги куоластааммыт сыһыаммытын көрдөрүөхтээхпит. Биһиги Сахабыт сирэ, Модун Арассыыйа мэлдьи кыаҕыра турарыгар бары биир киһи курдук куоластыахпытын наада», — диэтэ Ил Дархан.

Саха Өрөспүүбүлүкэтин баһылыга куоластааһын үс күн ыытылларын бэлиэтээн эттэ. Саха сирин олохтоохторо быыбарга көхтөөхтүк кытталларыгар ыҥырда.

Арассыыйа Бэрэсидьиэнин быыбара кулун тутар 15, 16, 17 күннэригэр ыытыллар.