Саха сиригэр болдьоҕун иннинэ 6 баһылык уонна Сэбиэт дьокутааттара талылыннылар

Олунньу 16 күнүгэр Саха сиригэр алта нэһилиэк баһылыктарын уонна Киров нэһилиэгин Сэбиэтин дьокутааттарын талыыга болдьоҕун иннинэ куоластааһын күнэ буолан ааста. Бу туһунан Киин быыбардыыр хамыыһыйатын пресс-сулууспата суруйар.

Куоластааһын түмүгүнэн 386 куолаһынан Алдан оройуонун Ленскэй бөһүөлэгин баһылыгынан Анатолий Потеруха («Биир Ньыгыл Арассыыйа») талылынна.

156 куолаһынан Бүлүү улууһун Бастакы Тоҕус нэһилиэгин баһылыгынан Анатолий Еремеев («Биир Ньыгыл Арассыыйа») буолла.

Кэбээйи улууһун Бастакы Лүчүүн баһылыгын Софрон Григорьев («Биир Ньыгыл Арассыыйа») 71 куолаһынан кыайда.

Өлөөн улууһун Солоҕоон нэһилиэгин баһылыгынан 78 куолаһынан Евдокия Петрова (бэйэ туруорунуу) талылынна.

Сунтаар улууһун Элгээйи нэһилиэгин баһылыгынан 547 куолаһынан Аркадий Самойлов («Биир Ньыгыл Арассыыйа») буолла.

Сунтаар улууһун Илимниир нэһилиэгин баһылыгынан Николай Иванов («Биир Ньыгыл Арассыыйа») кыайда.

Кэбээйи улууһун Киров нэһилиэгин Сэбиэтин дьокутааттарынан 9 хандьыдаат талылынна.

Быыбар учаастактарыгар куоластааһын хаамыытын хандьыдааттар уонна уопсастыбаннай балаата бэрэстэбиитэллэрэ кэтээн көрдүлэр.