Ленскэй оройуонугар ахсынньы 10 күнүгэр баһылыгы быыбардыахтара

Ленскэй улууһун баһылыгын быыбара ахсынньы 10 күнүгэр буолуоҕа диэн оройуон дьаһалтатын пресс-сулууспата иһитиннэрэр. Бу туһунан быһаарыныыны дьокутааттар уочараттаах сиэссийэ кэмигэр ылыммыттар.

Дьокутааттар Ленскэй оройуонун баһылыга Жумарт Абильманов боломуочуйатын болдьоҕун иннинэ устуммутун уонна оройуон салайааччытын быыбарын даататын ыйыы боппуруостарын көрдүлэр. Ленскэй быыбардыыр хамыыһыйатын бэрэссэдээтэлэ Елена Ермакова этэринэн, дойду бэрэсидьиэнин быыбарын кытта атын ханнык да быыбар ыытыллыа суохтаах. «Ол эбэтэр, кэлэр сыл кулун тутарыгар биһиги быыбардаабаппыт», — диир кини.

Онон сибээстээн, муниципальнай таһымнаах быыбары сокуон быһыытынан болдьоҕун иннинэ ыытыахха сөп.

Билигин Ленскэй оройуонун баһылыгын эбээһинэһин  Александр Черепанов толорор. Кини алта сыл устата баһылыгы инвестиционнай уонна экэнэмиичэскэй бэлиитикэҕэ солбуйааччынан үлэлээбитэ.