Саха сиригэр инфраструктураны сайыннарыыга 207 мөл. солк. көрүлүннэ

Дойду бырабыыталыстыбата Уһук Илин сүрүн эрэгийиэннэрин эбии үбүлээһининэн өйүөҕэ. РФ бырабыыталыстыбатын бэрэссэдээтэлэ Михаил Мишустин тустаах дьаһалга илии баттаата, ол быһыытынан Саха сирэ федеральнай бүддьүөттэн 207,6 мөлүйүөн солкуобайы ылыаҕа.

Приморскай кыраайы кытта холбоон икки эрэгийиэҥҥэ өйөбүл үп-харчы уопсай кээмэйэ 280 мөлүйүөн солкуобайтан тахсыаҕа. Бу үп-харчы Уһук Илиҥҥэ экэнэмиичэскэй үүнүү кииннэрин сайыннарыы чэрчитинэн, суолталаах инфраструктура бырайыактарын олоххо киллэриигэ туһуланаллар. Вице-премьер Юрий Трутнев бэлиэтээбитинэн, үбүлээһин бүддьүөт харчытын былааннаахтык уонна көдьүүстээхтик туһанарга бэриллэр.

Анаммыт үп-харчы Уһук Илин сайдыытын киэҥ далааһыннаах судаарыстыбаннай бырагырааматынан көрүллэр. Чугастааҕы үс сылга, 2026-с сылтан 2028-с сылга диэри, маннык сыалларга федеральнай бүддьүөккэ номнуо 111 миллиард солкуобай кээмэйдээх сүҥкэн суума көрүлүннэ. Бу уһун болдьохтоох үбүлээһин Саха сиригэр социальнай эйгэни тупсарыыны, дьиэ тутуутун уонна хомунаалынай ситимнэри саҥардыыны салгыырга кыах биэриэҕэ.