Саха сиригэр “Профессионалитет” бырайыак иитинэн үөрэх бырагырааматын кэҥэтэллэр

Дьокуускайдааҕы тыа хаһаайыстыбатын тиэхиньикумун баазатыгар тэриллибит эрэгийиэҥҥэ бастакы үөрэтэр-производственнай кииҥҥэ (кластер) “Идэҕэ сыыппара технологиятын туһаныы” дьиссиппилиинэ модулунан каадыры бэлэмниир 9 саҥа үөрэх бырагыраамата оҥоһуллубут.

Санатан эттэххэ, Владимир Путин Судаарыстыбаннай Мунньахха Этиитигэр “Профессионалитет” бырайыагы биллэ кэҥэтиэххэ диэн бэлиэтээбитэ.

“Миэхэ, Судаарыстыбаннай Сэбиэт орто анал үөрэххэ оробуочай бөлөҕүн салайааччытыгар, дойду бэрэсидьиэнэ Этиитигэр “Профессионалитет” бырагырааманы, саҥа каадырдары бэлэмнээһини, экэниэмикэни оробуочай исписээлинэстэринэн хааччыйыыны кытта сибээстээх дьоһуннаах этиитин истэр суолталаах”, — диэн Ил Дархан Айсен Николаев Этии туһунан санаатын үллэстэригэр эттэ.

Ил Дархан дьаһалынан быйыл тохсунньуга тыа хаһаайыстыбатын кластерын үлэтин Профессионалитет бырайыак сүрүннүүр эрэгийиэннээҕи кэтээн көрөр киин тэриллибитэ.

Эрэгийиэннээҕи кэтээн көрөр сэбиэт, Бырабыыталыстыба бэрэссэдээтэлин солбуйааччы Сергей Местников салайааччылаах бастакы мунньахха федеральнай бырайыак олоххо киириитин түмүгүн уонна тыа хаһаайыстыбатын кластерын үлэтин былаанын көрдүлэр.

Былырыын Дьокуускайдааҕы тыа хаһаайыстыбатын тиэхиньикума тыа хаһаайыстыбатын салаатыгар оробуочай каадырдары бэлэмнииргэ 100 мөл. солк. суумалаах федеральнай граны сүүйбүтэ. Маны таһынан, эрэгийиэн бүддьүөтүттэн 21,5 мөл. солк., бүддьүөтү таһынан дохуоттан тэрил ыларга, бырайыак олоххо киириитинэн тэрээһиннэри ыытыыга 18,95 мөл. солк. көрүллүбүтэ.

Бу үбүнэн тиэхиньикум дьиэтин өрөмүөннээбиттэрэ, 19 үөрэтэр лабаратыарыйаны тэрилинэн хааччыйбыттара, тыа хаһаайыстыбатын тиэхиньикэтин уонна тэрилин туһанар уонна өрөмүөннүр лабаратыарыйа 520 кв.м. иэннээх үөрэтэр-быыстапкалыыр киинэ тутулунна. Тиэхиньикум преподавателлэрэ дойду биллэр тэрилтэлэригэр үөрэннилэр уонна үлэ уопутун эбинэр үөрэххэ (стажировка) сырыттылар.

Бу үөрэх дьылыгар 7 исписээлинэс уонна 1 идэ киирбит: «Агрономия», «Тыа хаһаайыстыбатын массыыналарын уонна тэриллэрин туһаныы уонна өрөмүөн», «Уу биоресурсалара уонна аквакультура», «Сүөһүттэн ылыллар аһылык бородууктатын технологията», «Ойуур уонна ойуур пааркатын хаһаайыстыбата», «Ветеринария», «Зоотехния» итиэннэ Төҥүлүтээҕи филиалга — «Тыа хаһаайыстыбатын электрическэй тэрилин өрөмүөннүүр уонна хааччыйар маастар».

Тиэхиньикум былаһааккатыгар Чурапчытааҕы аграрнай-тиэхиньиичэскэй кэллиэһи кытта “Агрономия”, “Ветеринария” исписээлинэстэригэр, Өлүөхүмэтээҕи тиэхиньикуму кытта “Тыа хаһаайыстыбатын тиэхиньикатын уонна тэрилин туһаныы уонна өрөмүөннээһин” исписээлинэстэригэр ситимнээх үөрэх көрүҥүн олоххо киллэрдилэр.

Устудьуоннар үөрэх бырагырааматын сорох чааһыгар Тыа хаһаайыстыбатын тиэхиньикумун саҥардыллыбыт былаһааккатыгар уонна тирэх тэрилэтэлэргэ – Дьокуускайдааҕы көтөр фабрикатыгар, “Хачыкаат” ТХПК, “Туймаада” Агрохолдиҥҥа үөрэнэллэр.

Саҥа үөрэх дьылыттан ситимнээх үөрэх бырагыраамата Нам тиэхиньикумун, Арктикатааҕы хотугу норуоттар кэллиэстэрин, Харбалаахтааҕы үөрэх комплексын кытта тэриллэр. Сергей Местников бэлиэтээбитинэн, сыл бүтүүтэ кластеры тэрийиини түмүктээбиттэр, билигин саамай сүрүн сорук – бу уонна кэлэр сылларга кластер ис үлэтин тэрийии.

“Профессионалитет” федеральнай бырайыак 2022 сылтан үлэлиир. Сүрүн соруга – тэрилтэлэргэ кылгас кэмнээх орто анал үөрэхтээх оробуочай каадырдары бэлэмнээһин уонна кинилэри үлэнэн хааччыйыы.

Ил Дархан уонна Бырабыыталыстыба пресс-сулууспата.