Саха сиригэр суоппардар 2000 тахса киһини уота суох хаалларбыттар
![](https://sakha-sire.ru/wp-content/uploads/2024/07/mycollages-28-1-960x640-1-960x596.jpg)
Ааспыт өрөбүллэргэ Өлүөхүмэ уонна Ленскэй оройуоннарыгар икки тыһыынчаттан тахса киһи суоппардар буруйдарыттан уота суох хаалбыттар.
Уот арахсыы кэмигэр 18 социальнай эбийиэк электроэниэргийэтэ суох олорбут. «Быһылаан тахсыбыт туһунан быраабы араҥаччылыыр уорганнарга биллэрилиннэ», – диэн «Якутскэнерго» арҕааҥы электрическэй ситимнэрин пресс-сулууспата суруйар.
Ол курдук, от ыйын 13 күнүгэр күнүс 15:25 чааска биллибэт массыына суол оҥоһуллар кэмигэр уот ситимин быспыт. Быһылаан түмүгэр 1900 киһи дьиэтигэр уонна 13 социальнай эбийиэктэргэ уот арахсыбыт. Энергетиктэр үс чаас устата уот ситимин холбообуттар. Эмиэ ити күн Ленскэй оройуонун Мурья сэлиэнньэтигэр экскаватор таһаҕаһы тиэйиигэ уот ситимин быспыт. Итинэн сибээстээн 295 дьиэҕэ уонна 5 социальнай эбийиэккэ уот барбыт. Аварийнай үлэлэр киэһэ 22:45 чааска диэри ыытыллыбыттара диэн «Якутскэнерго» хампаанньа биллэрдэ.
Сообщить об опечатке
Текст, который будет отправлен нашим редакторам: