Саха сиригэр түөкүттэр суукка иһигэр 5 мөл. солк. тахса суума харчыны уорбуттар

Саха сиригэр ааспыт суукка иһигэр полицияҕа түөкүннээһин туһунан икки киһи тыллаабыт.

Бу туһунан Саха сиринээҕи ИДьМ пресс-сулууспата иһитиннэрэр. Ол курдук, Бүлүү оройуонун бааһынай хаһаайыстыбатын баһылыга инвестицияҕа харчытын үлүннэрэн ылаары, 975 тыһыынча солкуобайын сүтэрбит.  Аферистарга итэҕэйэн эмсэҕэлээччи былырыын от ыйыттан албыннаппыт. Оттон бибилэтиэкэ үлэһитигэр түөкүттэр салайааччы аатыттан кубулунан эрийбиттэр уонна 5 чаас иһигэр 170 тыһыынча солкуобайы уорбуттар.

Ону таһынан полицияҕа оптуобус суоппарыттан, биэнсийэлээх дьахтартан, электромонтертан уонна тыа хаһаайыстыбатын кэпэрэтиибин салайааччытыттан баан счетуттан харчы уорбуттарын туһунан 4 иһитиннэрии киирбит. Хоромньу уопсай суумата 4 мөлүйүөн солкуобай буолбут.