Саха сирин архитектурата: «Градо Студио» алта бырайыага «ДальАрх» бириэмийэ финалыгар таҕыста

Саха сириттэн «Градо Студио» архитектурнай бюротун алта бырайыага Уһук Илин уокуругун «ДальАрх» маҥнайгы Национальнай архитектура бириэмийэтин шорт-лииһигэр киирдэ. Үлэлэр үс номинацияҕа кытталлар. Кыайыылаахтары  ахсынньы 2 күнүгэр Дьокуускайга буолар бириэмийэни туттарыы үөрүүлээх тэрээһинигэр биллэриэхтэрэ.

«Ахсынньы 2 күнүгэр Дьокуускайга лауреаттарга бириэмийэни туттарыы буолуоҕа. Уһук Илин куораттарын уонна бөһүөлэктэрин инникитин туһунан идэтийбит кэпсэтиини таһаарар туһуттан архитектордары уонна куораты тутааччылары бииргэ түмүөхпүт. Саамай бастыҥ быһаарыылар биһиги эрэгийиэннэрбитигэр олоххо киирэллэрэ, хас биирдии сир климатын, устуоруйатын уонна уратытын учуоттаан дьоҥҥо-сэргэҕэ табыгас эйгэни тэрийэллэрэ олус суолталаах», — диэн бэлиэтээтэ Саха сирин Ил Дархана Айсен Николаев.

Финалга Найба сэлиэнньэтигэр «Наман» кытылы тупсарыы бастакы уочарата, Тиксиигэ «Эйэ болуоссата», Дьокуускайга «Алгыс», «Зеркальный лес» уонна «Байкалова» олорор дьиэ комплекстарын стилобаттарын тупсаран оҥоруу, ону тэҥэ Таатта улууһун киирии бэлиэлэрин комплекса аастылар.

Бюро икки бырайыага бу иннинэ бүтүн Арассыыйа таһымыгар билиниллибиттэрэ. Арктика уустук килиимэттээх усулуобуйатыгар сабыылаах уопсастыбаннай эйгэни тэрийиини көрөр «Наман» кытыл Арассыыйатааҕы куонкурус кыайыылааҕа буолбута. Оттон биир сылынан эрдэ куонкуруска Тиксиитээҕи «Эйэ болуоссата» кыайбыта.

«„Градо“ архитектурнай бюротун үлэтэ архитектура уонна уопсастыбаннай эйгэни тэрийиигэ хас биирдии сир уратытын учуоттуур төһөлөөх суолталааҕын көрдөрөр. Бу Саха сирин курдук, килиимэт усулуобуйата, нэһилиэнньэлээх пууннар устуоруйалара уонна дьон олоҕун-дьаһаҕын уратыта бырайыактааһыҥҥа сүрүн оруолу оонньуур сиригэр ордук суолталаах. Бюро бырайыактарыгар олохтоох уратыларга болҕомто уурулларын көрөбүт — ол кыра сэлиэнньэ кытылын, Тиксиигэ уопсастыбаннай эйгэни эбэтэр Дьокуускай куорат эйгэтин тупсарыы да буоллун. Чопчу маннык быһаарыылар биһиги нэһилиэнньэлээх пууннарбыт ураты көстүүлэрин оҥороллор уонна олохтоохторго ордук табыгастаах гыналлар», — диэн бэлиэтээтэ Саха сирин сүрүн архитектора Любовь Папок.

Уопсайа бириэмийэ финалыгар Саха сириттэн түөрт архитектурнай бюро бырайыактара таҕыстылар: «Градо Студио», «НОМАДО», «Архиграф» уонна «Перемена».

Санатан эттэххэ, алтынньы саҥатыгар дьүүллүүр сүбэ 320 сайаапканы көрөн бүтэрбитэ уонна Уһук Илин 10 эрэгийиэниттэн 88 финалиһы быһаарбыта. Шорт-лиискэ олорор уонна дьиэ-уот, социальнай эбийиэктэр, уопсастыбаннай эйгэлэр, туризм инфраструктуратын, ону тэҥэ бырамыысыланнас эбийиэктэрин бырайыактара киирдилэр.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.