Дьокуускайга Саха сирин бастакы бэрэсидьиэнэ Михаил Николаевы кытта бырастыыластылар

Атырдьах ыйын 7 күнүгэр Дьокуускайга Д.К. Сивцев-Суорун Омоллоон аатынан Опера уонна балет тыйаатырыгар Михаил Ефимович Николаевтыын бырастыылаһыы тэрээһинэ буолан ааста.

Кутурҕан тэрээһин сарсыарда 10 чаастан киэһэ 8 чааска диэри буолла. Бу кэм устата Саха сирин тыһыынчанан олохтооҕо өрөспүүбүлүкэ бастакы бэрэсидьиэнин кытта быраһаайдаһа кэллэ. Арассыыйа уонна Саха сирин былаахтарынан сабыллыбыт хоруобу тыйаатыр сыанатыгар туруорбуттар. Аттыгар Арассыыйа Сэбилэниилээх Күүстэрин бочуоттаах харабыллара бааллар.

Михаил Ефимович Николаевы бүгүн, атырдьах ыйын 8 күнүгэр төрөөбүт дойдутугар Хаҥалас улууһун Өктөм сэлиэнньэтигэр таһаараллар. Кутурҕаннаах миитин Хаҥалас улууһун Чапаев сэлиэнньэтигэр Билим дьоҕус академиятыгар ыытыллар.

Саха Өрөспүүбүлүкэтин бастакы бэрэсидьиэнэ, СӨ судаарыстыбаннай сүбэһитэ Михаил Ефимович Николаев атырдьах ыйын 4 күнүгэр  86 сааһыгар олохтон барда. Атырдьах ыйын 5-8 күннэригэр Саха сиригэр кутурҕан күннэрэ биллэриллибиттэрэ.

Ил Дархан уонна Бырабыыталыстыба пресс-сулууспата.