Саха сирин дзюдоистката Надежда Татарченко «Большой шлем» турнирга кыттыаҕа

Саха сирин дзюдоҕа сүүмэрдэммит хамаандатын биир бастыҥ спортсмена Надежда Татарченко Турцияҕа ыытыллар «Большой шлем» турнирга Арассыыйа хамаандатын састаабыгар киирэн кыттар буолла. Бу туһунан «Триумф» успуорка бэлэмнээх буолуу киин пресс-сулууспата иһитиннэрэр.

«Большой шлем» турнир рейтиннээх күрэхтэһиинэн буолар. Ол аата манна миэстэлэспит спортсменнар норуоттар икки ардыларынааҕы рейтиҥҥэ очукуолара эбиллэр. Онтон  бастыҥнар Олимпиадаҕа кыттыахтара.

Барыллаан дааннайдарынан, күрэхтэһии кулун тутар 29-31 күннэригэр буолуоҕа. Манна 97 дойдуттан 600 дзюдоист кыттара былааннанар.

Надежда Татарченко кулун тутар 30 күнүгэр күрэхтэһиэҕэ.