Саха сирин фехтовальщиктара норуоттар икки ардыларынааҕы турнирга кытталлар

Владивостокка атырдьах ыйын 1-3 күннэригэр фехтованиеҕа «Тихоокеанский форпост» диэн норуоттар икки ардыларынааҕы турнир буола турар. Күрэхтэһии «Олимпиец» СК баазатыгар ыытыллар. 

Турнирга Арассыыйаттан уонна Кытайтан 200-тэн тахса кыттааччы кэлбит. Фехтовальщиктар үс көрүҥүнэн күрэхтэһэллэр: рапира, ыспаага уонна саабыла.

Дьокуускайтан «Вензель» кулууп 16 иитиллээччитэ кыттар. Кинилэри тириэньэр Ефросиния Николаевна Волынкинка илдьэ сылдьар.

Турнир бастакы күнүн түмүгүнэн оҕолор 1 кыһыл көмүс, 1 үрүҥ көмүс уонна 1 боруонса мэтээллээхтэр: бастакы миэстэ — Михаил Федоров (Дьокуускай куорат 2-с №-дээх оскуолатын үөрэнээччитэ), иккис миэстэ — Кирилл Волынкин (Дьокуускай куорат 9-с №-дээх оскуолатын үөрэнээччитэ), үһүс миэстэ — Дмитрий Черненко (Дьокуускай куорат 33-с №-дээх оскуолатын үөрэнээччитэ).