Саха сирин икки тустууга аан дойду чөмпүйэнээтигэр кыттыаҕа

Саха сирин легионердара Арыйаан Тютрин уонна Ньургун Скрябин Беларусь аатыттан көҥүл тустууга аан дойду чөмпүйэнээтигэр кытталлар. Чөмпүйэнээт Албания киин куоратыгар Тиранаҕа алтынньы 28-31 күннэригэр ыытыллар. Бу туһунан СӨ сүүмэрдэммит хамаандаларын спортивнай бэлэмнээһиҥҥэ өрөспүүбүлүкэтээҕи киин иһитиннэрэр.

Чөмпүйэнээккэ олимпийскай ыйааһыҥҥа суох категориялардаах тустууктар кытталлар. Парижтааҕы Олимпиадаҕа кыттыбыт спортсменнары аһардыбаттар.

Арыйаан Тютрин 61 киилэҕэ, Ньургун Скрябин 70 киилэҕэ тустуохтара. Бэйэлэрин категорияларыттан биирдии ыйааһын үрдээн кытталлар.

Күрэхтэһии сэрэбиэйэ ыытыллыбыта. Арыйаан Тютрин бастакы утарсааччытынан Монголияттан Цогбадрах Цевенсурен, оттон Ньургун Скрябин утарсааччытынан Ирантан Сина Махди буоллулар.

Тустууктар бүгүн, алтынньы 30 күнүгэр, көбүөргэ тахсыахтара.