А.Сорокин, ЯСИА
От ыйын 18 күнүгэр Саха Өрөспүүбүлүкэтин Ил Дарханын салайыытынан Ыксаллаах быһыыны-майгыны сэрэтиигэ, туоратыыга уонна баһаартан куттал суох буолуутун хааччыйыыга хамыыһыйа мунньаҕа буолла.
Өймөкөөн, Муома уонна Абый оройуоннарыгар ардахтан халааннаабытынан эрэгийиэннээҕи ыксалаах быһыы эрэсиимин киллэрэргэ, хамыыһыйаны тэрийэргэ, чөлүгэр түһэриини хонтуруоллуурга этилиннэ.
“Өрөспүүбүлүкэҕэ балаһыанньа ыгым. Дохсун ардахтар түмүктэригэр Индигиир эбэ хаатыттан таҕыста, оттон халаан долгуна Алданынан иһэр. Алдан хайысхатыгар балаһыанньа холку курдук эрээри, эмиэ тустаах сэрэхэдийиини үөскэтэр”, — диэтэ Айсен Николаев.
Кини Өймөкөөн оройуонугар, ону тэҥэ Абый оройуонун Кэбэргэнэтигэр ЫБМ эрэсиимэ киллэриллибитин бэлиэтээтэ. Улаханнык эмсэҕэлээбит Өймөкөөн оройуонугар материальнай саппаас уонна гуманитарнай көмө тиийбит. 104 киһи уонна 43 тиэхиньикэ үлэлиир.
“Өймөкөөн оройуонугар уу сыыйа түһэр. Ол эрээри Кэбэргэнэҕэ уу таһыма үрдүүрэ бэлиэтэнэр”, — диэтэ Айсен Николаев.
Өрөспүүбүлүкэ баһылыга бу оройуоннарга маннык халааннар алта сылга биирдэ хатыланалларын санатта, урут 2013 уонна 2019 сс. буолбута. “Кылаабынайа дьон кэмигэр уонна толору көмөнү ылыахтаах. Билигин бастакы уочараттаах сорудах – уу түспүтүн кэннэ хоромньуну ааҕыы”, — диэтэ кини.
Өймөкөөн сэлиэнньэтин таһыгар уу таһыма сыыйа түһэр. Чугастааҕы икки сууккаҕа уу таһыма түһүөҕэ. Уус Ньараҕа бөһүөлэк аттыгар уу таһыма кутталлаах бэлиэттэн намыһах. Хонуу сэл. аттынан 56 см. намыһах.
Өймөкөөн уонна Муома оройуоннарыгар от ыйын 20 күнүгэр ардыаҕа, сүрүннээн Индигиир илин өттүгэр, Халыма диэки. От ыйын 21 күнүгэр эмиэ ардыан сөп.
Өймөкөөн оройуонугар ЫБМ эрэсиимэ от ыйын 15 күнүттэн олохтоммута. Муома оройуонугар от ыйын 16 күнүттэн киллэриллибитэ. Абый оройуонугар ЫБМ эрэсиимэ от ыйын 17 күнүттэн Майыар национальнай бөһүөлэгэр ЫБМ эрэсиимэ олохтоммута.
Халаан содулун туоратыыга ЫБМ уонна Быыһыыр сулууспа күүстэрэ туһаныллаллар. Салгын суудуналара уматыгы, аһы-үөлү, гуманитарнай көмөнү тиэртилэр. Дьокуускайга 31 киһини, ол иһигэр 18 оҕону эвакуациялаатылар.
Мунньах түмүгэр Айсен Николаев бу оройуоннарга чөлүгэр түһэрэр үлэлэри ыытыыны хонтуруоллуурга соруйда. Маны кылгас болдьоххо ыытыллыахтаах. Атырдьах ыйын 1 күнүгэр диэри Бырабыыталыстыба уурааҕынан халааны туоратар кэлимсэ миэрэлэр торумнаныахтаахтар. Ону тэҥэ Бырабыыталыстыба Бэрэссэдээтэлэ Кирилл Бычков чугастааҕы күннэргэ бырабыыталыстыба бөлөҕүн кытта Өймөкөөн оройуонугар тиийэллэригэр соруйда.
ЫБМ уонна ГО министиэристибэтэ муниципалитеттар сайаапкаларынан өрөспүүбүлүкэ саппааһыттан материальнай ресурсалары таһаарыахтаах. ОДьКХ министиэристибэтэ уу түспүтүн кэнниттэн дезинфекция ыытыахтаах, иһэр уонна туттар уунан хааччыйыахтаах. Дьиэлэри куурдар туһуттан оттук сезонун эрдэ саҕалааһыны көрүөххэ диэтэ.
Тырааныспар министиэристибэтэ массыына суолларын уонна муосталары чөлүгэр түһэриэхтээх. Гуманитарнай көмөнү тиэрдиигэ болҕомто уурулунна. Тыа хаһаайыстыбатын минситиэристибэтэ сүөһү аһылыгын бэлэмнээһини тэрийиэхтээх.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска: Андрей Сорокин, ЯСИА
Сиһилии: https://www.sakha.gov.ru/news/8571
Ааспыт сууккаҕа Саха сиригэр аҕыс буруйу оҥоруу буолбутун туһунан дьуһуурунай борокуруор иһитиннэрэр. Дьокуускайга автомойка сиэйпэтиттэн…
Бэҕэһээ, от ыйын 19 күнүгэр, Томпо улууһугар баар Сунтаар Хайатыгар, Хаандыга бөһүөлэгиттэн 238 км тэйиччи…
Арыгылааһын аныгы уопсастыба биир сүрүн кыһалҕатынан буолар. Саха сиригэр эрэ буолбакка, дойду үрдүнэн бу кыһалҕа…
Өймөкөөҥҥө уу түһээтин кытта Томтор, Куйдуһун олохтоохторо уонна "Сахаэнерго" тэрилтэ үлэһиттэрэ дьаныардаахтык үлэлээн, Куйдуһуҥҥа туоруур…
Кэнники сылларга Саха сиригэр ойуур баһаардара туруулара – өрөспүүбүлүкэ экологическай кыһалҕаларыттан биирдэстэринэн буолла. Биллэн турар,…
Бүгүн, от ыйын 20 күнүгэр, Саха сирин сорох улуустарыгар +33 кыраадыс буолара уонна этиҥнээх ардах…