Саха сирин историктарын уонна кыраайы үөрэтээччилэрин бастакы бириэмэйилэрин туттардылар

СӨ Бырабыыталыстыбатын Бэрэссэдээтэлин солбуйааччы Сергей Местников Саха сирин историктарын уонна кыраайы үөрэтээччилэрин Сойууһун бастакы уопсастыбаннай бириэмийэлэрин туттарда. Тэрээһин муус устар 5 күнүгэр СӨ историктарын уонна кыраайы үөрэтэр научнай- практическай кэмпириэнсийэ чэрчитинэн ыытылынна.

«Саха сирин салалтатын аатыттан историктарга, кыраайы үөрэтээччилэргэ, энтузиастарга төрөөбүт нэһилиэктэрин, оройуоннарын историяларын үөрэтиигэ, үүнэр көлүөнэҕэ патриотизмы иитиигэ кылааттарын иһин барҕа махталбын тиэрдэбин. Эһиги олус дьоһун дьыаланан дьарыктанаҕыт, төрөөбүт кыраайгыт туһунан билиини кэҥэтэҕит, историческай уонна култуурунай грамотнаһын сайыннараҕыт. Бэйэ сэлиэнньэтэн, кыра дойдуттан, аан дойдуга аатырбыт биир дойдулаахтарын олохторун-дьаһахтарын, айар үлэлэрин үөрэтииттэн ыла дойду историятыгар интэриэһи үөскэтэр. Тиһигин быспакка кэҥэтэн, бу таптал төрөөбүт дойдутугар историятыгар көһөр»,-диэн СӨ Бырабыыталыстыбатын вице- премьерэ кэпсээтэ.

Сергей Местников Егор Спиридонович Шишигин аатынан СӨ историктарын уонна кыраайы үөрэтээччилэр Сойуустарын бириэмийэтин Сэһэн Адьыакап аатынан Уус Алдан историко- краеведческай түмэл дириэктэригэр Павел Пермяковка туттарда.

Егор Дмитриевич Андросов аатынан уопсастыбаннай бириэмийэ лауреатын А.Е. Мординов аатынан Таатта лиссиэйин дириэктэрэ Изабелла Сивцева буолла.

Үөһээ Бүлүүтээҕи историктарын уонна кыраайы үөрэтэччилэрин уопсастыбатын салайааччыта Бурхалей Макаров Георгий Евгеньевич Федоров аатынан СӨ историктарын уонна кыраайы үөрэтээччилэрин Сойууһун бириэмийэтин хаһаайынынан буолла.

Сергей Местников биллиилээх суруналыыс, энтузиаст Владимир Степанов салайар кыраайы үөрэтээччилэрин уонна историктарын Сойуустарын үлэтин үрдүктүк сыаналаата. Бу сылтан Сойуус чилиэттэрэ үлэлэрин өссө кэҥэтэргэ былаанныыллар, ол иһигэр улуустарынан сылдьан сырдатар үлэни ыытары былаанныыллар.

Быйыл Сойуус төрдүс сылын научнай-практическай кэмпириэнсийэни ыытта. Тэрээһин Аҕа дойду Улуу сэриитигэр Кыайыы 80 сылыгар ананна. Пленарнай мунньахха Дьокуускай куорат сэрии сылларыгар Кыайыыга көмөтүн, о.д.а. тиэмэлэргэ тустарынан дакылааттары иһиттилэр. Күн иккис аҥаарыгар Саха сирин историятын секционнай мунньахтара буолла. Муус устар 6 күнүгэр СӨ историктарын уонна краеведтарын Сойууһун уопсай мунньаҕын түмүгүн таһаардылар.

СӨ Ил Дарханын уонна Бырабыыталыстыбатын пресс-сулууспата