Саха сирин катастрофа мэдиссиинэтин киинэ Арассыыйаҕа бастыҥынан билиннэ

Саха сирин катастрофа мэдиссиинэтин киинэ ыраах сытар территторияларынан көмөнү оҥорууга Арассыыйа экстреннай сулууспаларын ортолоругар лидер буолла.

Саха эмчиттэрэ Саха сиригэр тахсар бары ыксаллаах быһыыга-майгыга үлэлииллэр. Тоҕус ый иһигэр быраастар ыраах сытар бөһүөлэктэртэн уопсайа 2,5 тыһ. киһи эвакуациялаабыттар.

«Бу биһиги эмчиттэрбит үлэлэрин түмүгэ. Саха эмчиттэрин үлэлэрэ федеральнай таһымҥа сыаналаммыта олус үчүгэй. Бу сыл тоҕус ыйынан санавиациянан 2,5 тыһыынча киһи эвакуацияламмыта. Саха сирин уустук, ыраах сытар нэһилиэктэринэн көмөнү күүтэр дьон-сэргэ туһугар хас биирдии быраас бэйэтин дууһатынан ыалдьар. Үлэ судургута суох, ыраах сытар нэһилиэктэргэ көтүүлэр күн-дьыл усулуобуйатыттан эмиэ тутулуктанар», — диэн СӨ катастрофа мэдииссиинэтин киинин мэдиссиинэ чааһын кылаабынай бырааһын солбуйааччы Наталья Слепцова иһитиннэрдэ.